NAHUM 2

Die ondergang van Nineve

1 Vyandelike leërs omsingel jou,

Nineve!

Beman julle wagposte!

Hou die paaie dop!

Wees slaggereed!

Versterk jou met alle mag!

2 Die land Israel lê kaal geplunder,

verwoes ná julle invalle.

Maar die Here sal weer

die eer en roem van Israel herstel.

3 Die geveg teen Nineve begin.

Die son blits rooi op die skilde.

Helderrooi is hulle uniforms.

Die son blink op die strydwaens

gereed vir die geveg,

en spiese word rondgeswaai.

4 Die strydwaens jaag roekeloos

deur die strate en oor die pleine.

Hulle flikker soos fakkels,

en blits verby soos weerlig.

5 Die koning beveel sy offisiere,

maar hulle struikel in hulle haas.

Hulle jaag na die stadsmure

om verdedigingslinies op te stel.

6 Te laat, die riviersluise is reeds oop!

Die paleis stort weerloos inmekaar!

7 Nineve se ballingskap is seker,

en die diensmeisies treur daaroor.

Hulle kla soos duiwe wat koer,

en gebroke slaan hulle

op hulle bors.

8 Nineve is soos ’n

lekkende opgaardam,

die inwoners verdwyn daaruit!

“Staan stil! Staan stil!”

word hulle beveel,

maar niemand draai om nie.

9 Steel die silwer, buit die goud!

Daar is net nie ’n einde

aan Nineve se skatte nie!

Daar is oneindig baie

kosbare voorwerpe!

10 Die stad is leeggedra,

kaalgestroop en verwoes.

Harte smelt en knieë knak,

hulle bene bewe,

en almal se gesigte is bleek.

11 Waar is die lêplek van die leeus,

die voerplek van die welpies?

Waar is Nineve,

die leeu van die nasies,

wie se wyfie en welpies kon loop

en sonder vrees gelewe het?

12 Jy het jou vyande verskeur

om jou welpies en wyfie te voed.

Jou stede en huise was vol met buit,

jou rusplekke gevul met roof.

13 Die Here, die Almagtige, sê:

“Ek is jou vyand!

Ek sal jou strydwaens

in rook en vlamme laat opgaan.

Die swaard sal jou soldate afmaai,

sonder enige buit op die aarde.

Die stemme van jou boodskappers

sal vir altyd stil wees.”

NAHUM 3

Die Here se oordeel oor Nineve

1 Dit sal sleg gaan met Nineve,

stad van moord en leuens.

Vol met buit, maar roof sonder ophou.

2 Swepe klap, wiele dreun!

Perde jaag, strydwaens bokspring!

3 Ruiters kom aangejaag,

swaarde blink en spiese blits.

Daar is baie dooies, hope liggame,

en mense struikel oor tallose lyke.

4 Nineve, die mooi en sedelose vrou,

is die oorsaak hiervan,

sy wat guns wen

met haar betowering,

wat volke verslaaf

met haar onsedelikheid

en families met haar toorkuns.

5 Die Here, die Almagtige, sê:

“Ek is jou vyand!

Ek sal jou rokke bo-oor jou gesig oplig

sodat die hele wêreld

jou naaktheid en skande kan aanskou.

6 Ek sal jou met mis besmeer

en jou verneder.

Ek sal ’n bespotting van jou maak.

7 Almal wat jou sien,

sal met afgryse wegdraai en sê:

‘Nineve lê heeltemal verwoes,

maar wie gee om?’

Waar kry Ek iemand om jou te troos?”

8 Is jy enigsins beter as Tebes,

gevestig aan die Nyl,

’n stad omring met riviere,

beskut met water aan alle kante?

9 Hulle bron van krag was

Etiopië en Egipte,

wat gelyk het of hulle

geen einde het nie.

Put en Libië was hulle bondgenote.

10 Nogtans is Tebes ingeneem

en sy inwoners weggevoer

as ballinge.

Op die straathoeke

is hulle babas doodgeslaan.

Die lot is gewerp oor belangrike leiers,

vernames is met kettings geboei.

11 Nineve, ook jy sal slinger

soos ’n dronkaard.

Uit vrees vir die vyand

sal jy soek na ’n skuiling,

na ’n beskerming van die vyand.

12 Al jou vestings is soos vyebome

met die eerste ryp vye.

Wanneer ’n mens die boom skud,

val die vye in die mond van die eter.

13 Kyk na jou soldate,

hulle is so swak soos vroue.

Jou landsgrense is wawyd oop

vir jou vyand.

Die sluitbalke van jou poorte

is met vuur verbrand.

14 Maak gereed vir die inval!

Gaar water op,

versterk jou vestings!

Gaan staan in die kleiput,

brei die klei!

Versterk die steenvorms!

15 Daar sal julle deur vuur

verteer word,

of deur die swaard sneuwel,

soos sprinkane wat julle verorber.

Vermeerder soos sprinkane,

word baie soos treksprinkane!

16 Jou stad is vol handelaars,

talryk soos sterre in die hemel.

Soos ’n swerm sprinkane stroop hulle

die land en vlieg weg.

17 Jou wagte is soos sprinkane,

jou beamptes

soos treksprinkane.

Hulle drom saam op die klipmure

om die koue te oorleef.

Maar as die son opkom,

vlieg hulle weg

en niemand weet waarheen nie.

18 Koning van Assirië,

jou leiers sluimer,

jou vername mense slaap.

Jou volk is op die berge versprei,

met niemand

wat hulle versamel nie.

19 Jou wond kan nie meer genees nie,

jou siekte is noodlottig.

Almal wat van jou ondergang hoor,

klap hulle hande van blydskap.

Want wie het nie

onder jou wreedheid gely nie?

HABAKUK 1

1 Die boodskap wat die profeet Habakuk in ’n visioen ontvang het.

Habakuk se klag

2 Here, hoe lank moet ek nog

roep om hulp?

U luister nie na my nie.

“Geweld!” roep ek baie hard,

maar U red my nie.

3 Waarom laat U my die onreg

en die ellende om my sien?

Waar ek ook al kyk,

sien ek vernietiging en geweld.

Ek is omring deur mense

wat daarvan hou

om te stry en te baklei.

4 Die wet het sy krag verloor

en is onbruikbaar.

Reg seëvier ook nie in die howe nie.

Daar is baie meer goddelose mense

as dié wat reg doen.

Daarom is die regsuitsprake verdraaid.

Die Here se antwoord

5 Die Here het geantwoord:

“Kyk na die nasies en staan verbaas!

Let op en staan verstom!

Ek doen iets in jou leeftyd,

iets wat jy nie sou glo

as iemand anders jou dit vertel nie.

6 Ek laat toe dat die Galdeërs

die nuwe wêreldmag word.

Hulle is wreed en gewelddadig,

’n nasie wat die wêreld

deurkruis om ander se woonplekke

af te neem.

7 Hulle is bekend

vir hulle verskriklike wreedheid.

Hulle doen net wat hulle wil

en niemand kan hulle keer nie.

8 Hulle perde is vinniger as luiperds.

Hulle is vurige mense,

erger as wolwe teen skemeraand.

Soos arende

duik hulle neer op hulle prooi.

9 “Hulle beur vorentoe,

gereed vir geweld.

Hulle leërs kom aangestorm

soos ’n wind uit die woestyn.

Hulle versamel krygsgevangenes

soos sand.

10 Hulle maak ’n bespotting

van konings

en lag regeerders uit.

Al die vestings minag hulle.

Teen die mure

stapel hulle grondwalle op

en neem die vestings in.

11 Hulle swiep verby soos die wind,

en verdwyn.

Maar hulle is skuldig,

hulle verafgod hulle eie krag.”

Habakuk se tweede klag

12 O Here my God, my Heilige,

U is daar van altyd af.

Sekerlik is dit tog nie u plan

om ons uit te wis nie!

O Here, ons Rots,

U het die Babiloniërs aangestel

om ons te straf.

13 U is te regverdig om onreg te duld.

Maar is dit vir U moontlik

om met gevoeligheid te sien

hoe hulle ons verswelg?

Is dit reg dat U stilbly

terwyl goddeloses dié verslind

wat meer regverdig is as hulle?

14 Is ons maar soos visse

wat gevang en doodgemaak word?

Is ons soos kruipende insekte,

sonder iemand

om hulle te lei?

15 Moet ons aan hoeke gevang

en met nette uitgetrek word?

Hulle versamel ons met sleepnette

en juig daaroor.

16 Hulle bring offers vir hulle nette

en brand wierook ter ere van hulle.

Hulle sê:

“Die nette laat ons in weelde leef

en voorsien ons van volop kos!”

17 Gaan U toelaat

dat hulle altyd hiermee wegkom?

Gaan hulle vir altyd suksesvol wees

met hulle gevoellose oorwinnings?

HABAKUK 2

1 Ek gaan in my uitkyktoring staan,

my plek inneem

op my wagpos in die muur.

Ek wag om te sien

wat die Here vir my gaan sê,

wat sy antwoord

op my klagte sal wees.

Die Here antwoord ’n tweede

keer

2 Toe het die Here geantwoord:

“Skryf my antwoord, die visioen,

in groot, duidelike letters

op kleitablette

sodat iemand wat verbyhardloop

dit kan lees.

3 Die dinge wat Ek beplan,

gaan nie nou dadelik gebeur nie.

Stadig maar seker breek die tyd aan

wanneer die visioen waar sal word.

Wag geduldig,

al voel dit of dit stadig gaan.

Wees seker dit gaan gebeur,

dit sal nie onnodig talm nie.

4 “Kyk na die hoogmoediges!

Hulle vertrou op hulleself

en hulle lewe is boos.

Die regverdiges, daarenteen,

sal deur hulle geloof lewe.

5 Voorspoed verlei mense,

en hoogmoedige mense

kom nooit tot rus nie.

Hulle is magshonger

met monde wat groot oop is

soos die dood.

Tog stel niks hulle ooit tevrede nie.

In hulle gulsigheid

versamel hulle baie nasies en volke

as gevangenes.

6 “Die tyd kom

wanneer hulle krygsgevangenes

hulle sal koggel en verneder

deur te sê:

‘Diewe! Einde ten laaste

het die gereg julle ingehaal!

Nou sal julle kry wat julle verdien

vir julle verdrukking en uitbuiting!’

7 Julle skuldeisers

sal skielik in woede reageer.

Hulle sal op julle toesak

terwyl julle bewend en hulpeloos is.

Hulle sal alles buit wat julle besit.

8 Julle het baie nasies beroof,

nou sal hulle julle beroof.

Julle moordenaars!

Julle het baie landelike gebiede

en ook die stede

met geweld geteister.

9 “Wee julle wat deur onreg ryk word!

Julle dink dat rykdom

vir julle sekuriteit sal waarborg,

dat julle families

buite bereik van gevaar sal wees.

10 Julle het julleself

in skande gebring

deur die moorde

wat julle gepleeg het.

Daardeur het julle

julle eie lewens prysgegee.

11 Die stene in die mure van julle huise

skree uit oor wat julle gedoen het.

Die klag teen julle weerklink

teen die balke in die plafon.

12 “Wee julle wat stede bou

met geld wat julle bekom het

deur moord en onreg!

13 Het die Here, die Almagtige,

nie beloof

dat die nasies se rykdom

tot as sal verbrand nie?

Hulle werk so hard,

maar dit is alles tevergeefs!

14 Die tyd sal aanbreek

dat die hele aarde vol sal word

met die kennis van die Here

se magtige teenwoordigheid

net soos water die see oordek.

15 “Wee julle wat julle bure

dronk maak!

Julle meng drank en maak hulle dronk

om na hulle naaktheid te kyk.

16 Binnekort sal dit julle beurt wees

om in skande te kom!

Kom, drink en word ontbloot!

Drink uit die beker van oordeel.

So sal julle eer in skande verander.

17 Julle kap die bome van Libanon af,

nou sal julle afgekap word!

Julle verskrik die wilde diere

deur hulle in strikke te vang.

Nou sal verskrikking julle tref

omdat julle oral in die stede

moord en geweld gepleeg het!

18 “Wat is die nut

om mensgemaakte afgode

te aanbid?

Dit is dwaas om julle vertroue te stel

op iets wat julle met julle eie hande

gemaak het.

Dit is ’n afgod wat nie kan praat nie.

Julle is dwase om dié leuens te glo!

19 Wee julle wat vir ’n stuk hout sê:

‘Word wakker! Kom red ons!’

Kan julle by ’n lewelose klip iets leer?

Kan ’n stom klip sê

wat om te doen?

Al is dit oorgetrek met goud en silwer

is dit heeltemal sonder lewe.

20 Die Here is in sy heilige tempel;

laat almal op aarde

stil wees in sy teenwoordigheid!”

HABAKUK 3

Habakuk se gebed

1 Hierdie is ’n gebed van Habakuk.

’n Lied.

2 O Here, ek het gehoor

wat van U vertel word.

Ek is in verwondering

oor alles wat U gedoen het.

Doen in ons tyd ook hierdie dinge

wat U in die verlede gedoen het.

Moenie vergeet om genadig

te wees nie

al is U baie kwaad.

3 God, die Heilige,

beweeg oor die woestyne van Edom

en van die Paranberg af.

Sy groot heerlikheid

vul die hemelruim.

Die aarde is vol van sy lof!

4 Helder ligstrale flits uit sy hand,

daar waar sy krag verskuil is.

5 Pes gaan voor Hom uit,

dodelike plae volg in sy voetspore.

6 As Hy stilstaan, skud die aarde.

Wanneer Hy kyk, bewe die nasies.

Hy laat oeroue berge verkrummel

en eeue oue heuwels platval.

7 Ek sien die tente van Kusan bewe,

die benoudheid van dié in Midian.

8 Was U kwaad vir die riviere, Here,

toe u woede teen strome ontvlam,

u toorn teen die see ontbrand het?

U het op perde gery

en op strydwaens van oorwinning!

9 U beveel u magtige wapens

om gereed te wees.

Sela

Met riviere kloof U die aarde oop.

10 Die berge sien wat gebeur en bewe,

onstuimige waters stroom verby.

Die diepwaters dreun,

met golwe wat opslaan

soos hande omhoog gelig.

11 Die son en die maan

het begin verdof,

verduister deur blitsende pyle

en die glans van u blinkende spies.

12 U stap oor die aarde

in verontwaardiging,

U vertrap die nasies in u woede.

13 U gaan uit om u volk te verlos,

U red u gesalfdes.

U verpletter die leier

van kwaaddoeners,

van kop tot tone stroop U hom kaal.

14 U deurboor die leier van die soldate

met sy eie spies.

Sy soldate storm uit soos ’n

warrelwind,

want hulle dink

Israel is ’n maklike prooi.

15 U vertrap die see met u perde

sodat magtige waters opbruis.

16 Toe ek al hierdie dinge hoor,

het ek gesidder.

My lippe het van vrees gebewe,

my liggaam het lam geword,

my bene het onder my ingegee.

Tog sal ek rustig wag vir die dag

wanneer rampspoed dié mense tref

wat besig is om ons aan te val.

17 Selfs al sal die vyebome nie bot nie

en die wingerd sonder druiwe staan,

al het die olyfoes misluk,

en lewer die landerye niks op nie,

al vergaan die kleinvee in die veld

en is die beeskrale leeg;

18 tog, ten spyte van alles,

sal ek my verbly in die Here!

Ek sal juig oor God

wat my verlos!

19 Die oppermagtige Here

is my krag!

Hy maak my voete

soos dié van ’n ribbok;

op hoë plekke

laat Hy my veilig loop.

(Vir die musiekleier: Die psalm moet met snaarinstrumente begelei word.)

SEFANJA 1

1 Sefanja was die seun van Kusi, wat weer die seun van Gedalja was. Gedalja was die seun van Amarja, en hy was weer die seun van Hiskia.

Die Here het boodskappe vir Sefanja gegee toe Josia, die seun van Amon, koning van Juda was.

Oordeel kom vir Juda

2 Die Here sê:

“Ek gaan alles op aarde wegneem:

3 mens en dier,

die voëls van die hemel

en die visse in die see.

Ek laat die goddeloses struikel

en vee hulle van die aarde af.

Ek, die Here, sê so!

4 Juda en die inwoners van Jerusalem

gaan Ek straf.

Ek gaan elke greintjie wat oor is

van die Baälaanbidding vernietig:

die bestaan van die afgodspriesters

en hulle priesterskap;

5 die mense wat op hulle dakke gaan

en buig om die sterre te aanbid;

die mense wat belowe om trou te wees

aan die Here,

maar terselfdertyd trou bewys

aan Molek.

6 Ek gaan ook die mense vernietig

wat My altyd aanbid het,

maar dit nou nie meer doen nie.

Hulle stel nie meer in die Here belang

of raadpleeg Hom nie.”

7 Wees stil in die teenwoordigheid

van die oppermagtige Here,

want die Here se oordeelsdag is naby.

Die Here berei ’n offerfees voor,

sy gaste het Hy reeds voorberei.

8 Die Here sê:

“Op die dag van die offerfees

sal Ek die leiers en die prinse straf.

Ek sal ook die mense straf

wat heidense gewoontes navolg.

9 Op dié dag sal Ek die mense straf

wat deelneem aan

heidense praktyke.

Dit sluit mense in wat ander bedrieg

en geweld aandoen

sodat die huise van hulle meesters

vol gemaak word met buit.”

10 Die Here sê ook:

“Op dié dag sal hulpkrete opgaan

by die Vispoort

wat tot by die nuwer deel van die stad

sal weerklink.

Harde knalslae

sal vanuit die heuwels opklink.

11 Inwoners van die markplek, huil!

Want almal sal sterf

wat daar koop en verkoop.

12 In dié tyd sal Ek in Jerusalem

al die donker hoekies

met lampe deursoek na hulle

wat so selftevrede in sonde lewe.

Ek sal hulle straf!

Hulle dink mos:

‘Die Here doen niks nie,

nie goed of sleg nie.’

13 Maar die vyand

sal juis hierdie mense

se besittings plunder

en hulle huise verwoes.

Hulle sal nie die voorreg geniet

om hulle nuwe huise te bewoon nie.

Hulle sal ook nie drink

van die wyn

van die wingerde

wat hulle aangeplant het nie.

14 “Die verskriklike Dag van die Here

is naby.

Die dag sal in ’n oogwink aanbreek.

Bitter uitroepe sal opklink,

dapper mans sal huil.

15 Dan sal Hy sy woede uitstort:

’n Tyd van swaarkry en angs.

’n Tyd van verwoesting

en vernietiging.

Dis ’n donker, uitsiglose tyd,

soos ’n swaar bewolkte dag,

16 ’n tyd van trompetgeskal

en oorlogskrete wat weerklink

oor versterkte stede

en vestingtorings.

17 “Ek bring benoudheid oor julle.

Julle sal loop soos blindes

wat pad soek

omdat julle teen My, die Here,

gesondig het.

Julle bloed sal uitgegiet word

soos stof,

julle ingewande soos mis.”

18 Die dag wanneer die Here

sy woede wys,

sal julle silwer en goud

van geen nut vir julle wees nie.

Die vuur van sy ywer

sal die hele land verteer.

Hy maak ’n skielike einde

aan alle mense op die aarde!

SEFANJA 2

Keer terug na die Here toe

1 Reël ’n byeenkoms en vergader,

skaamtelose nasie!

2 Doen dit terwyl julle nog kan,

voordat die oordeel begin

en julle soos kaf sal wegwaai.

Doen dit nou,

voordat die brandende woede

van die Here oor julle ontvlam.

Doen dit

voordat sy verskriklike oordeelsdag

vir julle aanbreek.

3 Soek die Here,

alle nederiges in die land,

en doen wat Hy van julle verwag.

Soek wat reg is

en wees nederig.

Miskien sal Hy julle beskerm

wanneer die oordeelsdag aanbreek.

Straf vir Filistynse stede

4 Gasa sal verlate lê

en Askelon sal verwoes word.

Laatmiddag sal Asdod se inwoners

uitgedryf wees

en Ekron se inwoners uitgeroei wees.

5 Dit sal ellendig gaan

met hulle wat van Kreta af kom,

met hulle wat woon

langs die kus by die see.

Dit is die Here se boodskap vir julle:

“Kanaän, land van die Filistyne,

Ek sal jou vernietig,

en geen inwoners sal meer oorbly nie.

6 Die kusgebied sal ’n weiveld wees,

’n kampplek vir herders,

en ’n skuiling vir skape.”

7 Dit sal ook ’n weiplek wees

vir die oorblyfsel van Juda.

In die aand sal die huise van Askelon

hulle rusplekke wees.

Die Here hulle God sal vir hulle sorg

en hulle weer

voorspoedig maak.

Straf vir Moab en Ammon

8 “Ek het gehoor hoe Moab

verkleinerend praat,

en hoe die Ammoniete

die spot dryf.

Hulle het my volk verneder

en hulle grondgebied bedreig.

9 “Daarom,” sê die Here,

die Almagtige,

die God van Israel,

“sowaar as wat Ek lewe,

Moab sal word soos Sodom

en Ammon soos Gomorra.

Hulle lande sal vol onkruid

en soutpanne wees,

’n woesteny vir altyd.

Dié van my volk wat oorleef het,

sal hulle beroof.

Die oorblyfsel van my volk

sal hulle land inneem.”

10 Dit is wat hulle kry

in ruil vir hulle verwaandheid,

want hulle het my volk verkleineer

en beledig,

sê die Here, die Almagtige.

11 Vir hulle sal die Here

’n verskrikking wees,

want al die gode in die land

vernietig Hy.

Mense uit alle dele van die wêreld,

elkeen in hulle eie land,

sal voor Hom neerbuig

en Hom aanbid.

Straf vir die Kussiete en Assirië

12 “Kussiete,” sê die Here, “ook julle

sal Ek doodmaak met my swaard.”

13 Hy sal die lande in die noorde tref:

Assirië sal Hy vernietig

en Nineve ’n verlate plek maak,

dor soos die woestyn.

14 Skape sal daar lê,

en diere van allerlei soorte.

Uile van verskeie spesies

sal slaap op die murasies.

Deur die oop vensters

sal hulle geroep weergalm.

Bourommel sal die ingange versper

en die sederhout sal ontbloot word.

15 Dit is die lot van hierdie stad

wat so sorgvry woon.

“Nêrens in die wêreld,”

het die stad geroem en gesê,

“is daar ’n stad soos hierdie een nie!”

Maar kyk, dit het

’n puinhoop geword,

’n lêplek vir wilde diere!

Verbygangers sal fluit van verbasing,

hulle hande in ongeloof saamslaan.

SEFANJA 3

Jerusalem se sonde en herstel

1 Wee die eiesinnige Jerusalem,

besoedelde stad van verdrukking.

2 Hulle is ongehoorsaam

en wil nie reggehelp word nie.

Hulle vertrou nie op die Here nie,

en aanbid nie hulle God nie.

3 Die stadsleiers is soos brullende leeus

wat jag maak op hulle prooi.

Die regters is wolwe

wat snags aas soek

en teen die môre niks oorlaat nie.

4 Die profete is verwaande leuenaars

wat net hulle eie voordeel soek.

Die priesters verontreinig die tempel

en oortree God se voorskrifte.

5 Maar die Here bly nog in die stad.

Hy doen geen onreg nie.

Dag vir dag is sy uitsprake regverdig,

elke nuwe dag sonder uitsondering.

Maar niemand sien dit raak nie,

en goddeloses

ken geen skaamte nie.

6 “Ek het baie nasies uitgeroei,

hulle verdedigingsmure vernietig.

Ek het hulle strate so beskadig

dat hulle onbegaanbaar is.

Ek het hulle stede só verwoes

dat geen inwoners oor is nie.

Hulle is heeltemal verlate.

7 Ek het gedink:

‘Nou sal hulle My eer en respekteer!

Hulle sal my voorskrifte

nou seker met erns beskou.

Dan sou dit nie nodig wees

om die stad weer te tref nie.’

Maar die teendeel is waar.

Hoe swaar Ek hulle ook al straf,

met ywer gaan hulle voort

om sondige dinge te doen.”

8 Maar nou sê die Here:

“Wees geduldig,

want die tyd breek aan vir My

om met regspraak te begin.

Ek sal die nasies versamel

en koninkryke bymekaarmaak.

My toorn en brandende woede

sal Ek oor hulle uitstort.

Die hele aarde sal verteer word

deur die vuur van my woede.

9 “Dan sal Ek die volke

’n suiwer taal gee

sodat hulle almal die Here aanroep

en Hom saam aanbid.

10 Selfs my volk wat verstrooi is

tot oorkant die riviere van Etiopië

sal kom om vir My offers te bring.

11 Dan hoef julle nie langer

skaam te wees

vir wat julle gedoen het

toe julle teen My

in opstand gekom het nie.

Ek sal ontslae raak van hoogmoediges

en arrogante mense onder julle.

Julle sal nie meer vol verwaandheid

op my tempelberg aanbid nie.

12 Ek sal eenvoudiges en behoeftiges

onder julle laat oorbly.

Hulle sal op die Here vertrou.

13 Die mense van Israel wat oorbly,

sal nie verkeerde dinge doen nie.

Hulle sal nie leuens vertel nie

en mekaar ook nie bedrieg nie.

Hulle sal soos skape rustig wei

en gaan lê om te slaap

sonder om vir iemand bang te wees.”

14 Sing, Jerusalem!

Skree hard, o Israel!

Wees bly en juig met oorgawe,

dogter van Jerusalem!

15 Die Here sal julle nie meer straf nie.

Hy sal julle vyande verdryf.

Die Here is Koning van Israel.

Hy is by julle.

Julle hoef nie meer enige rampe

te vrees nie.

16 Daardie dag sal vir Jerusalem

gesê word:

“Moenie bang wees nie, Sion!

Moenie moedeloos word nie.

17 Die Here jou God is by julle.

Hy is ’n magtige Verlosser.

Hy is buitengewoon bly oor julle.

Sy liefde sal julle rustig maak.

Met uitroepe van vreugde

sal Hy oor julle jubel.”

18 “Dié wat treur, maak Ek bymekaar,

ver van die plek van ontmoeting.

Dit is hulle wat uit jou voortkom

en swaar dra aan die skande.

19 Ek sal in dié tyd afreken met almal

wat julle onderdruk het,

Ek sal die hulpelose mense help.

Ek sal die verstrooides terugbring.

Dié wat verneder is in ander lande,

hulle naam sal Ek in eer herstel.

20 Op die regte tyd

sal Ek julle bymekaarmaak

en julle terugbring huis toe.

Ek sal sorg dat volke van die wêreld

julle weer ag

en met respek behandel.

Julle sal met julle eie oë sien

hoe Ek julle lot verander,

sê die Here!”

HAGGAI 1

1 Herbou die tempel!

Op 29 Augustus, in die tweede jaar wat Darius koning was, het die Here die profeet Haggai gebruik om ’n boodskap aan Serubbabel en Jesua oor te dra. Serubbabel, die seun van Sealtiël, was goewerneur van Juda, en Jesua, die seun van Josadak, was die hoëpriester.

2 “Die Here, die Almagtige, sê: Die mense sê: ‘Die tyd het nog nie aangebreek om die huis van die Here, die tempel, te herbou nie.’”

3 Die Here het toe deur die profeet Haggai die volgende boodskap gestuur:

4 “Hoe kan julle in weelderige huise bly terwyl my huis ’n ruïne is?

5 Die Here, die Almagtige, sê: Dink ’n bietjie na oor hoe sake vir julle staan!

6 Julle het baie aanplantings gedoen, maar die oes was maar skraal. Julle het nou wel kos om te eet, maar julle is nog honger. Julle het wyn om te drink, maar nie genoeg om julle dors te les nie. Julle het klere om aan te trek, maar dit is nie voldoende om julle warm te hou nie. Julle geld raak weg asof dit gebêre is in ’n broeksak met gate!

7 “Die Here, die Almagtige, sê: Dink ’n bietjie na oor hoe sake vir julle staan!

8 Gaan haal hout op die heuwels en begin dan my huis herstel. Dit sal My tevrede stel en Ek sal voel dat julle My eer betoon, sê die Here.

9 Julle het gehoop dat dit ’n goeie oes sal wees, maar dit was maar skraal. Die oes wat julle nog huis toe gebring het, het Ek weggewaai. Waarom? Omdat julle almal besig is om julle eie netjiese huise te bou en dit terwyl my huis in puin lê, sê die Here, die Almagtige.

10 Dit is die rede hoekom daar nie dou uit die hemel kom nie en die aarde nie graan oplewer nie.

11 Ek is verantwoordelik vir die droogte oor die weivelde en die heuwels. Dit is ’n droogte wat die graan, die druiwe, die olywe en al die ander graangewasse beskadig; ’n droogte wat julle en julle vee sal laat honger lei; ’n droogte wat alles waaraan julle so hard gewerk het, tot niet sal laat gaan.”

12 Die profeet Haggai het die boodskap van die Here aan die mense oorgedra. Serubbabel, Jesua en al die mense wat in die land agtergebly het, het die boodskap van die Here hulle God gehoorsaam. Hulle het toe in alle erns die Here begin aanbid.

13 Die Here se boodskapper Haggai het toe hierdie boodskap van die Here vir die mense gebring: “Ek is by julle, sê die Here!”

14 Hierdeur het die Here die goewerneur Serubbabel en die hoëpriester Jesua, asook al die Here se mense wat in die land agtergebly het, baie entoesiasties gemaak. Hulle het na die huis van die Here, die Almagtige, hulle God gekom en daaraan begin werk.

15 Dit was op 21 September, die tweede jaar wat Darius koning was.

HAGGAI 2

Die prag van die nuwe tempel

1 Op 17 Oktober van dieselfde jaar het die Here weer vir die profeet Haggai ’n boodskap gegee.

2 “Sê vir Serubbabel, die seun van Sealtiël, goewerneur van Juda, en Jesua, die seun van Josadak, die hoëpriester, asook vir al die Here se mense wat in die land oorgebly het, die volgende:

3 Is daar nog enigiemand wat kan onthou hoe hierdie huis, die tempel, vroeër gelyk het? Hoe vergelyk die tempel nou met daardie een van vroeër? Daar is geen vergelyking nie, nie waar nie!

4 Maar skep moed, Serubbabel, skep moed, Jesua, seun van Josadak, die hoëpriester, sê die Here. Ook al die mense wat nog in die land oor is, moet moed skep, sê die Here. Skep moed en doen die werk, want Ek is by julle, sê die Here, die Almagtige.

5 My Gees sal by julle bly soos Ek julle belowe het toe julle uit Egipte getrek het. Julle moet glad nie bang wees nie.”

6 Dit is wat die oppermagtige Here sê: “Binnekort gaan Ek die hemel en die aarde weer skud. Ek gaan die oseane en die droë grond skud.

7 Al die volke gaan Ek ook skud. Al hierdie nasies se skatte sal na hierdie tempel toe gebring word. Ek sal hierdie plek met heerlikheid vul, sê die Here, die Almagtige.

8 Die silwer en die goud behoort aan My, sê die Here, die Almagtige.

9 Die toekomstige roem van hierdie tempel sal baie groter wees as wat dit in die verlede was, sê die Here, die Almagtige. Ek sal in hierdie plek vrede bewerkstellig. Ek, die Here, die Almagtige, bevestig dit!”

Gehoorsaamheid bring

voorspoed

10 Op 18 Desember van die tweede jaar wat Darius koning was, het die Here die volgende boodskap deur die profeet Haggai gestuur:

11 “Die Here, die Almagtige, sê: Vra vir die priesters die volgende vraag oor die gebooie:

12 Sê nou een van julle dra ’n heilige offer in ’n sak van sy klere. En sê nou hy raak aan ’n stuk brood, gekookte kos, wyn, olie of enige ander vorm van kos, sal dit dan gewy wees?”

Die priesters het geantwoord: “Nee.”

13 Haggai vra toe: “Sê nou iemand het onrein geword omdat so ’n persoon aan ’n lyk geraak het. As hy dan raak aan al die dinge wat reeds genoem is, is die goed dan ook onrein?”

Die priesters het geantwoord: “Ja.”

14 Toe sê Haggai: “Dit geld ook vir hierdie mense en hierdie volk, sê die Here. Net mooi alles wat hulle doen en wat hulle offer, is onrein.

15 Hou dit voortaan in gedagte. Dink ’n bietjie hoe julle omstandighede was voordat julle die fondament van die Here se tempel begin lê het.

16 Toe julle gehoop het vir ten minste twintig mate koring, het julle net tien geoes. En toe julle verwag het om darem 50 vate wyn uit die pers te kry, het dit net twintig opgelewer.

17 Ek het brandkoring, heuningdou en hael gestuur om julle handewerk te vernietig. Tog, ten spyte daarvan, het julle geweier om na My toe terug te kom, sê die Here.

18 “Let baie mooi op wat van vandag af, 18 Desember, die dag waarop die fondamente van die tempel gelê is, sal gebeur:

19 Ek maak nou aan julle ’n belofte terwyl die saad nog in die skuur is en die wingerd, die vyeboom, die granaatboom en die olyfboom nog nie hulle vrug opgelewer het nie. Van vandag af sal Ek julle voorspoedig maak.”

Beloftes aan Serubbabel

20 Die Here het op 18 Desember ’n tweede boodskap vir Haggai gegee:

21 “Sê vir Serubbabel, die goewerneur van Juda, dat Ek op die punt staan om die hemel en die aarde te skud.

22 Ek gaan konings se ryke omverwerp. Ek gaan die mag van koninkryke vernietig. Ek gaan strydwaens en hulle bemanning omdop. Die perde sal neerslaan en die ruiters sal mekaar doodmaak.

23 “Die dag wanneer dit gebeur, sê die Here, die Almagtige, sal Ek jou vereer, Serubbabel, seun van Sealtiël, my dienskneg. Ek sal jou beskou soos ’n seëlring aan my vinger, sê die Here. Ek sal dit doen omdat Ek jou gekies het. Ek, die Here, die Almagtige, sê dit!”