Category: OPENBARING

Die twee getuies

1 Toe is daar aan my ’n meetstok gegee wat soos ’n septer lyk, en daar is vir my gesê: “Gaan meet die tempel van God en die altaar en die mense wat in die tempel aanbid.

2 Die voorhof wat buitekant die tempel geleë is, moet jy weglaat en dit nie meet nie, omdat dit aan die nasies oorgegee is. Hulle sal die heilige stad 42 maande lank met die voete vertrap.

3 En Ek sal aan my twee getuies, met sakklere aan, opdrag gee om die wil van God vir 1 260 dae lank te verkondig.”

4 Hulle is die twee olyfbome en ook die twee kandelare wat voor die Here van die hele aarde staan.

5 As iemand hulle leed wil aandoen, kom daar vuurvlamme uit hulle monde wat hulle vyande verbrand. Elkeen wat hulle leed wil aandoen, moet só doodgemaak word.

6 Hulle beskik oor die mag om die hemel te sluit sodat dit nie sal reën nie vir die volle tyd wat hulle die wil van God verkondig. Hulle beskik ook oor die mag om die waters in bloed te verander en om die aarde met elke moontlike plaag te tref, so dikwels as wat hulle dit nodig vind.

7 Wanneer hulle egter hulle getuienis klaar gelewer het, sal die dier wat uit die bodemlose put uit opgekom het, teen hulle oorlog maak en hy sal hulle oorwin en doodmaak.

8 Hulle lyke sal langs die breë straat van die groot stad lê. Dit is die stad wat figuurlik Sodom en Egipte genoem word, waar hulle Here ook gekruisig is.

9 Vir drie en ’n half dae lank sal mense vanuit al die volke, stamme, taalgroepe en nasies hulle lyke sien lê. En hulle sal nie toelaat dat die lyke in ’n grafkamer begrawe word nie.

10 Die bewoners van die aarde sal juig oor hulle dood en hulle sal baie bly wees daaroor en aan mekaar geskenke stuur, omdat hierdie twee profete die bewoners van die aarde geteister het.

11 Maar na drie en ’n half dae het die lewegewende Gees van God in hulle gekom. Toe hulle op hulle voete orent kom, het ’n groot skrik almal wat hulle gesien het, oorweldig.

12 Hulle het ook ’n kragtige stem van die hemel af hoor sê: “Kom op hierheen!” Hulle het toe in ’n wolk na die hemel toe opgevaar terwyl hulle vyande toekyk.

13 Op daardie selfde uur was daar ’n geweldige aardbewing en ’n tiende van die stad het inmekaargetuimel. In die aardbewing is 7 000 mense gedood en die oorblywende mense het beangs geword en aan die God van die hemel eer betoon.

14 Die tweede verskrikking is verby. Kyk, die derde een kom spoedig.

Die koningsheerskappy behoort

aan die Here en sy Christus

15 Die sewende engel het toe op sy trompet geblaas. Daar was kragtige stemme in die hemel wat sê:

“Die koninklike heerskappy

oor die wêreld

behoort nou aan ons Here

en sy Christus,

en Hy sal as koning heers

vir altyd.”

16 Die 24 ouderlinge wat op hulle trone voor God sit, het op hulle gesigte neergeval en God aanbid

17 en gesê:

“Here God, Almagtige,

U wat is en wat was,

ons dank U

dat U nou u groot mag

opgeneem het

en as koning heers.

18 Die nasies het baie kwaad geword,

maar nou het die tyd

van u oordeel aangebreek

om dié wat dood is, te oordeel;

om u diensknegte, die profete

te beloon

en dié wat aan God

toegewy is,

en dié wat ontsag het

vir u Naam,

klein en groot,

en dié wat die aarde vernietig,

óók te vernietig.”

19 Toe is God se tempel in die hemel geopen, en sy verbondsark wat in sy tempel is, het sigbaar geword. Daar was toe weerligstrale, dreunings, donderslae, ’n aardbewing en ’n hewige haelstorm.

Die draak bedreig die geboorte

van die Christuskind

1 ’n Groot teken het in die hemel sigbaar geword: ’n vrou wat met die son omklee is, die maan onder haar voete, en op haar kop ’n kroon met twaalf sterre.

2 Sy was verwagtend en het geskreeu van die geboortepyne en die benoudheid.

3 Daar het ook ’n ander teken in die hemel sigbaar geword: Kyk net – ’n groot rooi draak met sewe koppe en tien horings en op sy koppe was daar sewe koningskrone.

4 Sy stert het ’n derde van die sterre van die hemel meegesleur en hulle op die aarde neergegooi. Die draak het reg voor die vrou wat op die punt was om geboorte te skenk, gaan staan om wanneer sy geboorte skenk, haar kind op te vreet.

5 Sy het geboorte geskenk aan ’n manlike kind, wat al die nasies met ’n ysterstaf sal beheer. Haar kind is weggeruk van die draak af, na God en na sy troon toe.

6 Die vrou het na die woestyn toe gevlug, waar sy ’n plek gehad het wat deur God vir haar voorberei is sodat hulle haar daar 1 260 dae lank kan versorg.

7 Daar het toe oorlog uitgebreek in die hemel: Migael en die engele onder sy beheer het oorlog gemaak teen die draak. Die draak en die engele onder sy beheer het aan die oorlog deelgeneem,

8 maar hy is verslaan. In die hemel was daar geen plek meer vir die draak en die engele onder sy beheer te vind nie.

9 Die reuse draak is uitgegooi, dit is die slang van die oertyd wat ook die duiwel en Satan genoem word, en wat die hele bewoonde wêreld verlei. Hy is op die aarde neergegooi, asook sy bose engele saam met hom.

10 Toe het ek ’n kragtige stem in die hemel hoor sê:

“Nou het die verlossing en die krag

en die koninklike heerskappy

van ons God aangebreek,

asook die mag van sy Christus.

Die aanklaer van ons

medegelowiges

is neergegooi,

hy wat hulle dag en nag

voor ons God aangekla het.

11 En hulle het hom self oorwin

op grond van die bloed

van die Lam

en die boodskap

waaroor hulle getuig het.

Hulle het hulle lewens

nie so liefgehad

dat hulle onwillig was

om vir Hom te sterf nie.

12 Daarom, juig daaroor, hemele

en dié wat daarin ’n woonplek

het!

Hoe vreeslik tog

vir die land en die see,

omdat die duiwel

na julle afgekom het

met fel woede

en met die besef

dat hy net ’n kort tydjie het.”

13 Toe die draak sien dat hy op die aarde neergegooi is, het hy die vrou wat geboorte gegee het aan die manlike kind, agtervolg.

14 Aan die vrou is egter twee groot arendsvlerke gegee sodat sy na haar plek in die woestyn kon vlieg. Dáár word sy versorg vir ’n tyd, tye en ’n halwe tyd, heeltemal buite bereik van die slang.

15 Die slang het toe uit sy bek ’n boog water soos ’n rivier agter die vrou aan uitgespoeg sodat sy deur die stroom meegesleur kon word,

16 maar die aarde het die vrou te hulp gesnel. Die aarde het sy mond oopgemaak en die rivier wat die draak uit sy bek uitgespoeg het, ingesluk.

17 Die draak het toe woedend geword vir die vrou en vertrek om oorlog te gaan maak teen die res van haar afstammelinge wat die gebooie van God gehoorsaam en vashou aan die getuienis wat Jesus gegee het.

18 Die draak het toe op die sand van die see gaan staan.

Die monster uit die see trek op

teen Christus

1 Toe het ek ’n monster uit die see sien opkom met tien horings en sewe koppe. Op sy horings was daar tien koningskrone en op sy koppe name wat God belaster het.

2 Die monster wat ek gesien het, het net soos ’n luiperd gelyk. Sy pote was net soos dié van ’n beer en sy bek net soos dié van ’n leeu. Die draak het van sy eie krag, sy troon en groot mag aan hom gegee.

3 Aan een van sy koppe was hy oënskynlik dodelik verwond, maar sy dodelike wond het gesond geword. Die hele wêreld het verwonderd agter dié monster aan geloop.

4 Hulle het in aanbidding neergeval voor die draak omdat hy aan die monster mag gegee het. En hulle het die monster aanbid en gesê: “Wie is soos die monster? En wie kan teen hom oorlog maak?”

5 Dié monster is toegelaat om vreeslike en lasterlike dinge te sê; aan hom is ook die mag verleen om 42 maande lank só op te tree.

6 Hy het sy mond oopgemaak om teen God te laster; hy het God as persoon, sy woonplek en dié wat in die hemel woon, belaster.

7 Hy is ook toegelaat om teen die gelowiges oorlog te maak en hulle te oorwin; aan hom is ook gesag gegee oor elke stam, volk, taalgroep en nasie.

8 Al die bewoners van die aarde sal in aanbidding voor hom neerkniel. Dit is hulle wie se name nie van die fondamentlegging van die wêreld af in die Boekrol van die Lewe aangeteken is nie – die Boekrol van die geslagte Lam.

9 Elkeen wat ’n oor het om te luister,

moet hoor.

10 Wie vir gevangenskap bestem is,

gaan in gevangenskap;

wie bestem is om met die swaard

doodgemaak te word,

sal so doodgemaak word.

In hierdie sake het die gelowiges volharding en vertroue nodig.

Die monster uit die aarde, in

diens van die draak en die

11 Toe het ek ’n ander monster gesien wat uit die aarde opkom. Hy het twee horings gehad, net soos ’n lam, maar hy het gepraat soos ’n draak.

12 Hy tree met al sy gesag namens die eerste monster op. En hy oorreed die aarde en al die bewoners daarvan om die eerste monster te aanbid, dit is dié een waarvan die dodelike wond gesond geword het.

13 Hy doen ook asemrowende wondertekens sodat hy voor die oë van die mense selfs vuur uit die hemel op die aarde laat neerkom.

14 En hy mislei die bewoners van die aarde deur die wondertekens wat hy toegelaat is om namens die monster te doen. Hy het ook die bewoners van die aarde beveel om ’n standbeeld vir die monster op te rig; dit is die monster wat die litteken van die swaard dra en wat weer lewend geword het.

15 Hy is ook toegelaat om lewe in die standbeeld van die monster te blaas sodat dit kan praat en almal laat doodmaak wat dit nie aanbid nie.

16 Hy verplig al sy volgelinge, klein en groot, ryk en arm, vryes en slawe, om ’n merk op hulle regterhand of op hulle voorkop te kry.

17 Dit word gedoen sodat niemand kan koop of verkoop sonder die merk van die naam van die monster, of die getal van sy naam nie.

18 In hierdie geval is onderskeidingsvermoë nodig. Laat die een wat insig het, die getal van die monster bereken, want dit is ’n mens se getal. Sy getal is 666.

Die 144 000 en die Lam op

Sionsberg

1 Toe het ek gesien, en kyk, die Lam staan op Sionsberg, en by Hom 144 000 met sy Naam en dié van sy Vader op hulle voorkoppe geskryf.

2 En ek het van die hemel af ’n geluid gehoor soos die gedruis van ’n groot waterval en soos die gerammel van swaar donderweer. Die geluid wat ek gehoor het, was soos dié van musikante wat op hulle siters speel.

3 Hulle sing ’n nuwe lied in die teenwoordigheid van die troon, die vier lewende wesens en die ouderlinge. Niemand behalwe die 144 000 wat van die aarde af losgekoop is, was in staat om hierdie lied te bemeester nie.

4 Dit is hulle wat hulle nie met vroue besoedel het nie omdat hulle onthouding beoefen het. Hulle volg die Lam waar Hy ook al lei. Hulle is onder die mense uit losgekoop as ’n eersteling van die oes, gewy aan God en aan die Lam.

5 En in hulle mond vind jy geen leuen nie. Hulle is vlekkeloos.

Die gelowiges moet volhard

6 Toe het ek ’n ander engel in die middel van die hemelruim sien vlieg. Hy het die ewige Goeie Nuus gebring. Hy moes die Goeie Nuus bring aan die bewoners van die aarde, aan elke nasie, stam, taalgroep en volk.

7 En hy het toe met ’n kragtige stem uitgeroep: “Eerbiedig God en bewys Hom eer, want die uur van sy oordeel het aangebreek. Val in aanbidding voor Hom neer wat die hemel en die aarde, die see en die waterfonteine gemaak het.”

8 ’n Ander engel, ’n tweede, het gevolg en uitgeroep: “Die magtige Babilon het geval, ja, geval! Babilon het al die nasies bedwelm met die wyn van haar passie vir seksuele sonde.”

9 Nog ’n engel, ’n derde, het agter die ander gevolg en met ’n kragtige stem uitgeroep: “As iemand neerkniel voor die monster en sy standbeeld en ’n merk op sy voorkop of op sy hand het,

10 sal hy ook van die wyn van God se woede moet drink. Dié wyn word onverdun in die beker van sy wraak ingeskink. Hulle sal ook gefolter word in vuur en swael in die teenwoordigheid van die heilige engele en die Lam.

11 Die rookwolk van hulle foltering styg vir altyd na bo, en hulle het dag en nag nie rus nie; dit is húlle wat die monster en sy standbeeld aanbid, en wat die merk van sy naam dra.”

12 Onder hierdie omstandighede het die gelowiges nodig om te volhard, hulle wat die opdragte van God en die geloof in Jesus bly bewaar.

13 Ek het ook ’n stem van die hemel af hoor sê: “Skryf dit op! Geseënd is die dooies wat van nou af in die Here sterf.”

“Ja,” sê die Gees, “hulle sal rus van hulle harde werk, want wat hulle gedoen het, vergesel hulle.”

Die graan en druiwe op aarde is

ryp om geoes te word

14 En kyk, ek het ’n wit wolk gesien. Op die wolk het Iemand soos die Seun van die Mens gesit. Hy het ’n goue kroon op sy kop gehad en ’n skerp sekel in sy hand.

15 ’n Ander engel het uit die tempel te voorskyn gekom en met ’n kragtige stem geroep na Hom wat op die wolk sit: “Steek u sekel in en oes, want die uur het aangebreek om te oes. Die oes van die aarde is ryp.”

16 Hy wat op die wolk sit, het toe sy sekel op die aarde ingesteek en die oes ingesamel.

17 Toe het ’n ander engel uit die rigting van die tempel in die hemel gekom terwyl hy ook ’n skerp sekel vashou.

18 Nog ’n ander engel het uit die rigting van die altaar gekom. Hy het mag oor die vuur gehad en met ’n kragtige stem geroep na hom wat die skerp sekel vashou en aan hom gesê: “Steek jou skerp sekel in en sny die druiwetrosse van die wingerd op die aarde af, want sy druiwe het ryp geword.”

19 Die engel het toe sy sekel op die aarde ingesteek en die wingerd geoes, en dit in die druiwepers van God se toorn gegooi.

20 Die druiwepers wat buitekant die stad geleë is, is getrap. Uit die druiwepers het daar bloed gestroom wat tot aan die tooms van die perde geraak en 300 kilometer ver gevloei het.

Die oorwinningslied van Moses

en van die Lam

1 Ek het toe ’n ander groot en uitsonderlike teken in die hemel gesien: sewe engele wat die sewe laaste plae hou waarmee God se toorn ten volle verwerklik was.

2 Toe het ek iets soos ’n spieëlgladde see gemeng met vuur gesien. Die oorwinnaars oor die monster en sy standbeeld, en die getal van sy naam, het by die spieëlgladde see gestaan met die siters wat God aan hulle gegee het.

3 Hulle sing die lied van Moses, die dienskneg van God. Dit is ook die lied van die Lam, wat só lui:

“Groot en uitsonderlik is u dade,

Here God, die Almagtige.

Regverdig en betroubaar is u paaie,

Koning van die nasies.

4 Wie sal nie ontsag vir U hê nie,

Here,

en nie u Naam verheerlik nie?

U alleen is heilig!

Al die nasies sal kom

en voor U in aanbidding neerval,

want u regverdige dade

het sigbaar geword.”

Sewe bakke vol kole van oordeel

word op die aarde uitgegooi

5 Hierna het ek gesien hoe die tempel in die hemel, die tent van getuienis, oopgemaak word,

6 en die sewe engele wat die sewe plae hou, het uit die tempel na vore getree. Hulle het helder wit linneklere aangehad, elkeen met ’n goue band om die bors.

7 Een van die vier lewende wesens het toe aan die sewe engele sewe goue bakke gegee, vol gemaak met die toorn van God – Hy wat vir altyd lewe.

8 Die tempel het toe van God se heerlikheid en krag vol rook geword. Niemand kon in die tempel ingaan totdat die sewe plae van die sewe engele voltrek was nie.

1 Ek het toe uit die rigting van die tempel ’n kragtige stem vir die sewe engele hoor sê: “Gaan nou, en gooi die sewe bakke, vol van God se toorn, op die aarde uit!”

2 Toe het die eerste engel gegaan en sy bak op die aarde uitgegooi. Daar het toe kwaadaardige en bose sere op dié mense ontstaan wat die merk van die monster dra en sy standbeeld aanbid het.

3 Die tweede engel het sy bak op die see uitgegooi. Dit het bloed geword soos dié van ’n lyk, en elke lewende organisme wat in die see is, het doodgegaan.

4 Die derde engel het sy bak op die riviere en waterfonteine uitgegooi. Ook dit het bloed geword.

5 Toe het ek die engel wat gesag oor die waters voer, hoor sê:

“U is regverdig,

U wat is en wat was,

U, die Heilige,

omdat U oor hierdie dinge u straf

voltrek het;

6 want hulle het die bloed

van dié wat aan U toegewy is

en van die profete vergiet,

en U het nou ook aan húlle

bloed gegee om te drink.

Hulle verdien dit.”

7 Ek het toe vanuit die rigting van die altaar iemand hoor sê:

“Ja, Here God, die Almagtige,

betroubaar en regverdig

is u oordele.”

8 Die vierde engel het toe sy bak op die son uitgegooi. Die son is in staat gestel om die mense met vuur te skroei.

9 Die mense is deur ’n hewige gloed geskroei en hulle het die Naam van God gevloek wat mag het oor hierdie plae. Hulle het egter nie tot inkeer gekom en aan Hom eer betoon nie.

10 Die vyfde engel het sy bak op die troon van die monster uitgegooi, en sy koninkryk is in duisternis gedompel. Die mense het hulle tonge begin byt van die pyn

11 en het die God van die hemel gevloek oor hulle pyne en sere. Hulle het hulle egter nie bekeer van hulle verkeerde dade nie.

12 Die sesde engel het toe sy bak op die groot Eufraatrivier uitgegooi. Sy vloei het opgedroog om ’n pad gereed te maak vir die konings wat van die ooste af kom.

13 Toe merk ek op dat uit die bek van die draak en uit die bek van die monster en uit die bek van die vals profeet drie onrein geeste kom, net soos paddas.

14 Dié geeste wat wondertekens doen, is van bose geeste afkomstig. Hulle gaan uit na die konings oor die hele bewoonde aarde heen om hulle bymekaar te maak vir die oorlog op die beslissende dag van God, die Almagtige.

15 “Wees bedag, Ek kom onverwags, net soos ’n dief. Geseënd is elkeen wat wakker loop en sy klere gereed hou sodat hy nie kaal hoef te loop en die mense sy verleentheid sien nie.”

16 Die geeste het die konings bymekaargemaak op die plek wat in Hebreeus Armageddon genoem word.

17 Die sewende engel het toe sy bak in die lug uitgegooi. ’n Kragtige stem het uit die rigting van die tempel, waar die troon ook is, gekom en gesê: “Dit is afgehandel.”

18 Toe het daar weerligstrale, dreunings en donderslae gekom. Daar was ook ’n reuse aardbewing soos wat daar nog nie was vandat die mens op die aarde gekom het nie – só ’n groot aardbewing was dit.

19 Die groot stad is in drie dele geskeur, en die stede van die nasies het ineengetuimel. God het dus hoegenaamd nie vergeet om vir die grote Babilon die beker met die wyn van sy woedende toorn te gee nie.

20 Elke eiland het eenvoudig weggeraak, en berge was ook nie meer te vind nie.

21 Groot haelstene, elkeen ongeveer 34 kilogram swaar, het van die hemel af op die mense gereën. Die mense het God egter gevloek oor die haelplaag omdat dit uitermate groot was.

Die groot prostituut wat die

aardbewoners verlei het

1 Een van die sewe engele wat die sewe bakke vashou, het nadergekom en met my gepraat: “Kom, ek sal jou die oordeel wys wat oor die groot prostituut, wat by die baie waterstrome bly, gaan kom.

2 Die konings van die aarde het ongeoorloofde seks met haar gehad, en die bewoners van die aarde het dronk geword van die wyn van haar seksuele wanpraktyke.”

3 Die engel het my toe deur die Gees meegevoer na die woestyn toe. Daar het ek ’n vrou gesien wat op ’n bloedrooi monster sit. Die monster was aan alle kante vol godslasterlike name geskryf, en hy het sewe koppe en tien horings gehad.

4 Die vrou het pers en bloedrooi klere aangehad en was getooi met goud, kosbare stene en pêrels. In haar hand het sy ’n goue beker gevul met vieslikhede en die onrein dinge van haar seksuele wanpraktyke vasgehou.

5 Op haar voorkop was ’n geheimsinnige naam geskryf: “Groot Babilon, die moeder van dié wat seksuele wanpraktyke beoefen en van die losbandighede op die aarde.”

6 Ek het ook gesien dat die vrou dronk was van die bloed van hulle wat aan God toegewy is, van die bloed van hulle wat getuies van Jesus is. Ek het haar aangestaar, geheel en al verwonderd.

7 Die engel sê toe vir my: “Waarom is jy so verwonderd? Ek sal jou vertel wat die misterie van hierdie vrou is, en van die monster met die sewe koppe en tien horings wat haar ronddra.

8 “Die monster wat jy gesien het, wás eers, maar is nie nou meer nie. Hy gaan uit die bodemlose diepte uit opkom om dan na die verderf toe te gaan. Die bewoners van die aarde wie se name nie van die fondamentlegging van die wêreld af in die Boekrol van die Lewe opgeskryf staan nie, sal verwonderd wees wanneer hulle die monster sien, want eers was hy en nou is hy nie meer nie en tog sal hy wees.

9 “In hierdie geval is onderskeidingsvermoë nodig vir elkeen wat oor wysheid beskik. Die sewe koppe is die sewe heuwels waarop die vrou sit. Verder is daar ook sewe konings.

10 Vyf konings het reeds geval. Die sesde een is nou hier. Die ander een het nog nie gekom nie; wanneer hy kom, moet hy net vir ’n kort rukkie bly.

11 En die monster wat eers was en nie meer is nie, is self die agtste koning. Hy hoort by die sewe, en is op pad na sy vernietiging toe.

12 “Die tien horings wat jy gesien het, is tien konings. Hulle het nog nie heerskappy ontvang nie, maar kry saam met die monster een uur lank gesag as konings.

13 Hulle het net een doelwit in gedagte en hulle stel hulle krag en mag tot beskikking van die monster.

14 Hulle sal teen die Lam oorlog maak, maar die Lam – saam met dié wat Hy geroep en uitverkies het en wat betroubaar is – sal hulle oorwin, want Hy is die Here van die heersers en die Koning van die konings.”

15 Die engel het ook aan my gesê: “Die waterstrome wat jy gesien het waar die prostituut sit, verteenwoordig volke, skares mense, nasies en taalgroepe.

16 En die tien horings wat jy gesien het en die monster, hulle sal die prostituut haat en haar kaalgestroop en verlate maak. Hulle sal haar vleis opeet en haar met vuur verskroei.

17 “God het dit in hulle harte geplant om aan sy bedoeling uitvoering te gee. Hulle het een en dieselfde plan gehad: om hulle heerskappy tot beskikking van die monster te stel totdat God se woorde in vervulling gegaan het.

18 “Die vrou wat jy gesien het, is die groot stad wat heerskappy voer oor die konings van die aarde.”

Die moeder van almal wat

seksuele wanpraktyke beoefen,

1 Hierna het ek ’n ander engel uit die hemel sien afkom. Hy het oor groot mag beskik en die aarde is deur sy glans verlig.

2 Hy het met ’n kragtige stem uitgeroep:

“Geval, geval het die grote Babilon!

Dit het die wegkruipplek geword

van die bose geeste,

’n skuilplek van elke onrein gees,

’n nes van elke onrein roofvoël

en van haatlike diere.

3 Al die nasies het dronk geword

van die dwelmdrank van

haar seksuele wanpraktyke.

Die konings van die aarde het

ongeoorloofde seksuele

verhoudings

met haar gehad,

en die handelaars van die aarde

het ryk geword

uit haar grenslose weelde.”

4 Toe het ek ’n ander stem uit die hemel hoor sê:

“Verlaat haar, my volk,

sodat julle nie deel het

aan haar sondes

en haar plae

julle nie ook tref nie.

5 Haar sondes het so hoog

soos die hemel

opgehoop

en God het haar wandade

onthou.

6 Gee aan haar terug

wat sy uitgedeel het,

en gee aan haar dubbel soveel

as wat sy aan julle gedoen het.

In die beker waarin sy vervolging

vir julle gemeng het,

moet julle twee keer soveel

inskink.

7 In dieselfde mate waarin sy

haarself verheerlik

en weelderig geleef het,

moet julle haar ook pyn en smart

aandoen.

In haar hart spog sy:

‘Ek sit as ’n koningin op my

troon.

Ek is nie ’n weduwee nie;

smart sal ek nooit ken nie.’

8 Daarom sal al haar plae

haar op een dag oorweldig:

dodelike siekte, smart

en hongersnood.

Sy sal deur vuur verteer word,

want krágtig is die Here God

wat haar oordeel.”

9 Die konings van die aarde wat seks met haar gehad het en hulle in weelderigheid gebaai het, sal huil en met groot droefheid reageer wanneer hulle die rook van haar uitgebrande liggaam sien.

10 Omdat haar pyniging hulle die skrik op die lyf jaag, sal hulle ver weg gaan staan terwyl hulle sê:

“Hoe vreeslik, hoe vreeslik

is dit tog vir die groot stad

Babilon,

die magtige stad!

Binne een uur

het die oordeel jou getref!”

Die handelaars van die aarde

huil oor hulle verlies

11 Die handelaars van die aarde huil en rou oor haar omdat niemand meer hulle vragte goed koop nie:

12 vragte goud en silwer, kosbare stene en pêrels, fyn pers klerasie en bloedrooi sy, elke soort hout, elke ivoorvoorwerp, elke kosbare voorwerp van hout, koper of yster of marmer,

13 kaneel en speserye, wierook, reukolie en reukwater, wyn en olyfolie, meel en koring, beeste en skape, perde, rytuie en slawe – sy het selfs met menselewens gesmous.

14 Hulle sê:

“Hierdie luukse waarna jy

in jou diepste binneste

gesmag het,

is jou nou ontneem.

Al die weelderige

en blink dinge

is nou vir jou verlore

en hulle sal dit nêrens

en nooit weer vind nie.”

15 Die handelaars van hierdie dinge wat hulleself deur haar verryk het, sal op ’n afstand gaan staan, omdat hulle bang is vir die foltering wat sy deurgaan. Hulle sal huil en rou

16 terwyl hulle sê:

“Hoe vreeslik,

hoe vreeslik

is dit tog vir die groot stad,

uitgevat in fyn linneklere,

pers en bloedrooi,

en opgesmuk met goud,

kosbare stene en pêrels.

17 In een enkele uur

is soveel rykdom uitgewis!”

Die seelui treur oor Babilon se

vernietiging

Elke stuurman en elkeen wat per skip iewers heen vaar, die matrose en almal wat van die see afhanklik is, het op ’n afstand gaan staan,

18 en hulle het geskreeu toe hulle die rook van haar verbranding sien. Hulle het gesê: “Watter stad was soos dié groot stad?”

19 Hulle het toe stof op hulle koppe gestrooi en dit uitgeskreeu. Huilend en in rou gedompel, het hulle aanhou sê:

“Hoe vreeslik, hoe vreeslik

is dit tog vir die groot stad!

Almal wat skepe besit op die see,

het hulle verryk uit haar bates.

In een enkele uur is sy verwoes.”

20 Wees uitgelate oor haar val, hemel,

en julle wat aan God gewy is,

apostels en profete!

God het die oordeel wat julle

uitgespreek het,

inderdaad oor haar gebring.

Die magtige Babilon het stil en

verlate geword

21 Toe het ’n baie sterk engel ’n yslike rots, so groot soos ’n maalklip, gevat en dit in die see gegooi en gesê:

“Net so gewelddadig sal

neergegooi word

Babilon, die groot stad,

en niemand sal dit

ooit weer vind nie.

22 Die geluid van siterspelers en

sangers,

van fluitspelers en

trompetblasers

sal nooit weer in jou

gehoor word nie.

Geen ambagsman, van watter

ambag ook al,

sal ooit weer in jou gevind word

nie.

Die geluid van ’n meule

sal nooit weer in jou

gehoor word nie.

23 Die lig van ’n lamp

sal nooit weer in jou skyn nie.

Die stem van ’n bruidegom en

bruid

sal nooit weer in jou

gehoor word nie.

Jou handelaars was die magnate

van hierdie aarde,

want deur jou bedrieëry het hulle

al die nasies om die bos gelei.”

24 In Babilon se strate is die bloed

van die profete gevind,

en van hulle wat aan God

toegewy is,

ja, almal wat op die aarde

doodgemaak is.

Die oorwinningslied van die

hemelse hallelujakoor

1 Hierna het ek iets gehoor soos die magtige lied van ’n groot skare in die hemel wat sing:

“Halleluja!

Die verlossing, die heerlikheid

en die krag

behoort aan ons God!

2 Betroubaar en regverdig

is sy oordele,

want Hy het die oordeel voltrek

oor die groot prostituut

wat die aarde met haar

seksuele wanpraktyke

besoedel het.

Hy het die bloed van sy

diensknegte wat sy laat vloei het,

gewreek.”

3 ’n Tweede keer het hulle uitgeroep:

“Halleluja!

Die rook van die stad

styg boontoe vir altyd.”

4 Die 24 ouderlinge en die vier lewende wesens het neergeval in aanbidding voor God wat op die troon sit terwyl hulle aanhou sê:

“Amen! Halleluja!”

Die bruilof van die Lam het nou

aangebreek

5 Van die troon se kant af het ’n stem opgeklink wat sê:

“Loof ons God,

al sy diensknegte,

dié wat Hom met ontsag bejeën,

klein en groot!”

6 Ek het toe iets gehoor soos die geluid van ’n baie groot skare, soos die gedruis van baie waterstrome en soos die gerammel van swaar donderweer. Hulle het aanhou uitroep:

“Halleluja!

Die Here heers as koning,

ons God, die Almagtige,

7 laat ons juig en jubel

en aan Hom eer betoon,

want die tyd het aangebreek

vir die bruilof van die Lam,

en sy bruid het haarself

daarop voorberei.

8 Sy is toegelaat om fyn,

helder skoon linne aan te trek.”

Die fyn linneklere is die regverdige dade van hulle wat aan God toegewy is.

9 Die engel het toe vir my gesê: “Skryf: Geseënd is hulle wat na die bruilofsfees van die Lam uitgenooi is.” Hy sê toe ook aan my: “Die woorde wat van God af kom, is betroubaar.”

10 Toe het ek voor sy voete neergeval om hom te aanbid. Hy sê egter vir my: “Oppas, moenie! Ek is net jou mededienskneg, en van al jou medegelowiges wat getuienis van hulle geloof in Jesus gelewer het. Buig neer in aanbidding voor God! Die kern van die profesie is inderdaad om van Jesus te getuig.”

Die Ruiter op die wit perd se

Naam is “Die Woord van God”

11 Toe het ek gesien die hemel is oopgemaak. En kyk! Daar verskyn ’n wit perd. Sy Ruiter word die Getroue en Betroubare genoem. Hy oordeel op ’n regverdige manier en voer ook só oorlog.

12 Sy oë was soos ’n vuurvlam, en op sy kop was daar baie heerserskrone. Op Hom was ’n Naam geskryf wat niemand anders as net Hyself geken het nie.

13 Hy het klere aangehad wat in bloed gedoop is, en sy Naam was: Die Woord van God.

14 Die leërs van die hemel het Hom op wit perde gevolg. Hulle het fyn, helder wit klere aangehad.

15 Uit sy mond het daar toe ’n skerp swaard gekom om die nasies mee te verslaan, en Hy sal hulle soos met ’n ysterstaf beheer. Hy sal self die parskuip vir die wyn trap, dit is die wyn van die toorn en woede van God, die Almagtige.

16 Op sy kleed, by die heup, was ’n Naam geskryf: “Koning van die konings en Here van die heersers.”

17 Toe het ek ’n engel by die son sien staan. Hy het met ’n kragtige stem uitgeroep, en aan al die voëls wat in die middel van die hemel vlieg, gesê: “Kom, kom bymekaar vir die groot feesmaaltyd van God!

18 Kom verslind die vleis van die konings en die vleis van die militêre aanvoerders, die vleis van die magtiges en die vleis van die perde en hulle ruiters, en ook die vleis van al die vry mense, slawe, klein en groot!”

19 Toe het ek gesien dat die monster die konings van die aarde met hulle leërs mobiliseer om oorlog te maak teen Hom wat op die perd sit en teen sy leërmag.

20 Maar die monster is gevange geneem en saam met hom ook die vals profeet wat die wondertekens ter ondersteuning van die monster gedoen het. Daarmee het hy die mense verlei wat die merkteken van die monster gedra en sy standbeeld aanbid het. Dié twee is lewendig in die vuurpoel gegooi wat met swael brand.

21 Die oorblywende mense is toe om die lewe gebring met die swaard wat uitgegaan het uit die mond van Hom wat op die perd sit. Al die voëls het hulle dik gevreet aan hulle vleis.

Satan word vir duisend jaar

gebind

1 Ek het toe ’n engel van die hemel af sien kom met die sleutel van die bodemlose put terwyl hy ’n groot ketting in sy hand hou.

2 Hy het die draak, die slang van die oertyd, dit is die duiwel en Satan, vasgegryp en hom vir 1 000 jaar gebind.

3 Die engel het hom in die bodemlose put gegooi, dit toegesluit en dit bokant hom verseël sodat hy nie langer die nasies sou verlei totdat die 1 000 jaar verstryk het nie. Daarna moet hy vir ’n klein rukkie losgemaak word.

4 Toe het ek trone gesien, en dié wat daarop sit, is die bevoegdheid gegee om te oordeel. Ek het ook die siele gesien van hulle wat onthoof is as gevolg van hulle getuienis aangaande Jesus en die boodskap van God. Dit is hulle wat nie voor die monster en sy standbeeld neergeval het in aanbidding nie, en nie die merkteken op hulle voorkop en op hulle hand ontvang het nie. Hulle het toe weer lewend geword en saam met Christus vir 1 000 jaar lank regeer.

5 Die oorblywende dooies het nie weer lewend geword voordat die 1 000 jaar om was nie. Dit is die eerste opstanding.

6 Geseënd en heilig is hy wat deel het aan die eerste opstanding. Oor hierdie mense het die tweede dood geen mag nie, maar hulle sal priesters van God en van Christus wees, en sal saam met Hom die 1 000 jaar lank as konings regeer.

Satan word oorwin en in die

poel van vuur en swael gegooi

7 Wanneer die 1 000 jaar om is, sal Satan uit sy tronk losgelaat word.

8 Hy sal dan daarop uit wees om die nasies tussen die vier hoeke van die aarde, die Gog en Magog, te verlei en om hulle te monster vir die oorlog. Getallegewys is hulle so baie soos die sand van die see.

9 Hulle het toe van oor die hele breedte van die aarde af opgetrek en die laer van hulle wat aan God toegewy is, en die geliefde stad omsingel. Daar het egter vuur van die hemel af op hulle afgekom en hulle verteer.

10 Satan wat hulle verlei het, is daarop in die poel van vuur en swael gegooi, daar waar die monster en die vals profeet ook reeds is. Daar sal hulle dag en nag vir altyd gefolter word.

Die boekrolle word oopgemaak

vir die finale

11 Ek het toe ’n groot wit troon gesien en Iemand wat daarop sit. Die aarde en die hemel het van Hom af weggevlug, en daar was nie meer wegkruipplek vir hulle oor nie.

12 Ek het ook die dooies, groot en klein, voor die troon sien staan. Daarna is die boekrolle oopgemaak. Daar is ook ’n ander boekrol oopgemaak, dit is die Boekrol van die Lewe. Die dooies is geoordeel volgens wat opgeskryf staan oor wat hulle gedoen het.

13 Die see het die dooies teruggegee wat daarin was, en die dood en die doderyk het die dooies teruggegee wat daarin was, en hulle is elkeen geoordeel volgens wat hulle gedoen het.

14 Die dood en die doderyk is toe in die vuurpoel gegooi. Dit is die tweede dood – die poel van vuur.

15 En as dit geblyk het dat iemand se naam nie in die Boekrol van die Lewe opgeskryf staan nie, is hy in die vuurpoel gegooi.