Category: JOB

Job: Ek het nie sonde gedoen nie

1 “Ek het myself belowe

dat ek nooit

na ’n jong meisie sal kyk

om haar te begeer nie.

2 Wat het God daarbo

vir ons gekies?

Wat is ons erfdeel

van die Almagtige?

3 Dit is ellende

vir die kwaaddoener

en rampe vir die boosdoener.

4 Sien Hy nie hoe ek optree nie?

Tel Hy nie elke tree

wat ek gee nie?

5 “Het ek ooit vir iemand gelieg,

of iemand bedrieg?

6 Laat God my dan weeg

met die regte maatstaf.

Hy ken my onskuld.

7 Het ek van die regte pad

afgedwaal?

Of het ek iets begeer

wat ek gesien het?

Is ek skuldig

aan enige ander sonde?

8 Laat iemand anders dan oes

wat ek geplant het

en alles uitpluk

wat ek gesaai het.

9 “As ek verlei is deur ’n vrou

of my buurman se vrou

begeer het,

10 mag my vrou

aan ’n ander behoort

en ander mans by haar slaap.

11 Want wellus

is ’n skandelike sonde,

’n misdaad

wat gestraf moet word.

12 Dit is ’n vernietigende vuur.

Dit sou alles verwoes het

wat ek besit.

13 “As ek onregverdig was

teenoor my manlike en vroulike

werkers,

of geweier het

om na hulle te luister,

14 hoe sou ek God

in die oë kon kyk

wanneer Hy my tot

verantwoording roep?

Wat sou ek antwoord

as Hy my daaroor ondervra?

15 Want Hy het my

en my werkers gemaak.

Hy is ons almal se Skepper.

16 “Het ek geweier

om die armes te help?

Of die hoop vernietig

van die weduwees

wat na my gekyk het vir hulp?

17 Was ek suinig

met my kos

en het ek geweier om dit te deel

met honger weeskinders?

18 Nee! Van jongs af

sorg ek vir weeskinders

soos ’n pa.

My hele lewe lank

gee ek om vir weduwees.

19 Waar ek ook al mense

dakloos en ’n arm man

sonder klere gesien het,

20 het hulle my geprys

omdat ek vir hulle

wolklere gegee het

om hulle warm te hou.

21 As ek gewelddadig was

teenoor ’n weeskind

omdat ek gedink het

ek sou daarmee wegkom –

22 mag my arm dan uit sy potjie

gedraai word!

Mag my arm van my skouer

afgeruk word!

23 Dit sou beter wees

as om onder die oordeel

van God te kom.

Want as ek

teen die Allerhoogste

moet staan,

watter hoop is daar vir my?

24 “Het ek op geld vertrou,

of gedink is ek veilig

omdat ek baie goud besit?

25 Hang my geluk af

van my rykdom

en alles wat ek besit?

26 Het ek ooit gekyk

na die son wat skyn,

of na die maan se silwerbaan

deur die ruimte,

27 en my heimlik laat verlei

om hulle te aanbid?

28 As dit so was, sou regters

my gestraf het,

want ek sou die God van die hemel

verloën het.

29 “Het ek ooit gejuig

by die ondergang

van my vyande?

Of was ek bly

as hulle skade gely het?

30 Nee, ek het nooit gesondig

deur enigiemand te vervloek

of iemand te verwens nie.

31 My werkers het nooit gesê

dat ek iemand laat honger ly nie.

32 Ek het nooit ’n vreemdeling

weggewys nie.

My deur het altyd

vir almal oopgestaan.

33 Het ek ooit probeer

om my sondes weg te steek

soos mense graag doen?

Het ek my ongeregtighede

probeer ontken?

34 Het ek stilgebly daaroor

en nie buitentoe gegaan nie

omdat ek bang was

dat mense op my sou neersien

en my verag?

35 “As daar maar net iemand was

wat na my wou luister

en my kant van die saak

wou sien!

Kyk, ek teken my naam

as my verdediging.

Laat die Almagtige

my wys dat ek verkeerd is.

Laat my Aanklaer

die klag teen my uitskryf!

36 Dan sou ek die aanklag

teenstaan.

Ek sou dit dra soos ’n kroon.

37 Want ek sou Hom presies sê

wat ek gedoen het.

Ek kan voor Hom staan,

soos ’n prins.

38 “As die grond wat ek bewerk

my aankla,

en al die ploegvore saam ween,

39 as ek dit wat daaruit

opgekom het, geëet het

sonder om te betaal,

of die eienaars vermoor het,

40 laat daar dan dissels groei

op daardie land

in die plek van koring,

en onkruid

in die plek van gort.”

Hier eindig Job se woorde.

Elihu reageer op Job se vriende

1 Job se drie vriende het geweier om verder met hom te argumenteer omdat hy daarop aangedring het dat hy onskuldig is.

2 Barakel se seun Elihu, ’n Bussiet uit die familie van Ram, het hom vir Job vererg. Hy was woedend omdat Job geweier het om te erken dat hy enige sonde gedoen het en dat God reg opgetree het om hom te straf.

3 Maar hy was ook kwaad vir Job se drie vriende omdat hulle Job nie kon antwoord nie en aantoon dat hy skuldig was nie.

4 Elihu het gewag voor hy praat omdat die ander mans ouer as hy was.

5 Maar toe hy sien dat hulle drie niks verder het om te sê nie, was hy woedend.

6 Elihu seun van Barakel die

Bussiet het gesê:

“Ek is nog jonk,

en julle is al oud.

Daarom was ek bang.

Ek wou nie waag

om vir julle te sê

wat ek dink nie.

7 Ek het gedink:

Laat mense wat ouer is, praat,

want wysheid kom met jare.

8 Dit is die gees in die mens

wat die mens insig gee,

die asem wat van die Almagtige

kom.

9 Maar soms is bejaardes

nie wys nie.

Soms het bejaardes

nie begrip

vir regverdigheid nie.

10 “Luister daarom

na my mening.

Ek sal julle sê wat ek dink.

11 Ek het lank gewag.

Ek het versigtig

na julle argumente geluister.

Ek het gehoor

hoe julle na woorde soek.

12 Ek het met aandag geluister,

maar nie een van julle

kon Job se argumente

weerlê of hom antwoord nie.

13 Moenie sê:

‘Ons het wysheid gevind.

Net God kan hom oortuig,

nie ’n mens nie.’

14 As Job met my geredeneer het,

sou ek nie dieselfde

argumente as julle

gebruik het nie!

15 “Julle is verslae.

Julle het niks meer te sê nie, woorde

ontbreek julle.

16 Moet ek aanhou wag,

noudat julle stil geword het?

Moet ek ook stilbly

omdat julle niks het om te sê nie?

17 Nee, ek sal sê wat ek dink.

Ek sal sekerlik

my mening gee.

18 Ek is tot barstens toe

vol woorde

en my gees dryf my

om te praat.

19 Ek is soos gistende wyn

in ’n nuwe wynsak.

My woorde is gereed

om uit te bars!

20 Ek moet praat

om verligting te kry.

Daarom, luister na wat ek sê

as ek antwoord.

21 Ek sal niemand voortrek nie,

en ek sal niemand vlei nie.

22 As ek dit sou probeer doen,

sou my Maker

’n einde aan my maak.”

Elihu spreek Job aan

1 “Luister na my woorde, Job!

Hoor alles wat ek wil sê!

2 Ek het nou begin,

laat my praat.

3 Ek praat in opregtheid,

ek het die waarheid in my mond.

4 Die Gees van God

het my gemaak,

die asem van die Almagtige

gee my lewe.

5 Antwoord my dan, as jy kan!

Berei jou voor

en stel jou standpunt.

6 Kyk, ek en jy

is dieselfde voor God.

Ek is ook van stof gemaak.

7 Daarom hoef jy nie

vir my bang te wees nie.

Ek gaan nie hard op jou afkom nie.

8 “Ek het na jou geluister,

ek het elke woord gehoor

wat jy gesê het.

9 Jy sê: ‘Ek is rein,

sonder sonde,

ek is onskuldig,

ek het nie gesondig nie.

10 God soek skoor met my.

Hy beskou my as sy vyand.

11 Hy sit my voete in die blok.

Elke tree van my

hou Hy dop.’

12 “Ek sê vir jou

jy is verkeerd.

Jy het self gesê:

‘God is groter as ’n mens.’

13 Nou, waarom bring jy dan

’n klag teen Hom?

Jy sê: ‘Hy luister nie

na mense nie.’

14 Maar God praat

op verskillende maniere.

Ons kom dit net nie agter nie.

15 Hy praat deur drome

en visioene,

in die nag wanneer mense

diep slaap

en op hulle beddens lê.

16 Hy fluister in hulle ore

en verskrik hulle

met sy waarskuwings.

17 Hy laat mense van gedagte

verander

om hulle van verkeerde dade

weg te hou,

en hulle van hoogmoed

te weerhou.

18 Hy red hulle van die graf,

van die diep rivier

van die dood.

19 Soms praat Hy met mense

deur ernstige siekte op ’n siekbed,

as pyn aan hulle liggaam knaag.

20 Dan verloor mense hulle

eetlus.

Die lekkerste kos walg hulle.

21 Hulle is later net vel en been.

22 Hulle staan met die een voet

in die graf.

Die dood wag vir hulle.

23 “Maar as ’n hemelse

boodskapper, ’n baie unieke een,

intree vir so ’n persoon

en hom regverdig verklaar,

24 sal God hom genadig wees

en sê:

‘Laat hom vry.

Moenie dat hy sterf nie,

want Ek het ’n losprys gevind

vir sy lewe.’

25 Dan word sy liggaam

weer so gesond

soos dié van ’n kind,

ferm en jeugdig

soos toe hy jonk was.

26 As hy bid tot God,

sal Hy hom aanvaar.

God sal hom met vreugde

ontvang,

en hom ’n mens maak

wat reg lewe.

27 Hy sal vir sy vriende sê:

‘Ek het gesondig

en verkeerd gedoen,

maar God het my nie gestraf

soos wat ek verdien het nie.

28 God het my gered van die graf,

en nou is my lewe

gevul met lig.’

29 “Ja, God doen al hierdie dinge

vir mense, weer en weer.

30 Hy red hulle van die graf

sodat hulle mag lewe

in die lig van die lewendes.

31 “Luister mooi, Job.

Luister na my.

Bly stil

en laat my nog praat.

32 As jy my kan antwoord,

praat dan.

Ek sou jou graag gelyk wou gee

dat jy geregverdig is.

33 As jy niks het om te sê nie,

luister dan na my.

Ek sal vir jou

wysheid leer.”

Elihu herinner Job aan God se

regverdigheid

1 Elihu het gesê:

2 “Luister na my,

julle wyse mans.

Gee aandag,

julle wat baie kennis het.

3 Net soos die mond

goeie kos proe,

so toets die oor die woorde.

4 Daarom, laat ons vir onsself

onderskei wat reg is;

laat ons saam leer wat goed is.

5 “Job het gesê:

‘Ek is onskuldig,

maar God het my regte

weggeneem.

6 Ek is onskuldig,

maar hulle noem my

’n leuenaar.

My lyding is ongeneeslik,

al het ek nie gesondig nie.’

7 Was daar al ooit iemand

so verwaand soos Job,

met sy dors na lasterlike praatjies?

8 Hy soek die geselskap op

van bose mense.

Hy bestee sy tyd

met kwaaddoeners.

9 Hy het selfs gesê:

‘Ek mors my tyd

om God tevrede te stel.’

10 “Luister na my,

julle wat verstand het!

Almal weet dat God

nie sondig nie.

Die Almagtige doen niks

verkeerd nie.

11 Hy vergeld mense

volgens hulle dade.

Hy behandel mense

volgens hulle optrede.

12 Dis ondenkbaar dat God

die verkeerde sou doen.

Die Almagtige kan nie

die reg verdraai nie.

13 Wie het die aarde

aan God se sorg toevertrou?

Wie het Hom aangestel

oor die hele wêreld?

14 As Hy sy Gees wegneem

en sy asem onttrek,

15 hou alle lewe op om te bestaan.

Mense word dan stof.

16 “As jy enige verstand het,

luister dan hierna.

Hoor wat ek sê.

17 Sou God kon regeer

as Hy regverdigheid haat?

Kan jy waag

om die almagtige Regter

te veroordeel?

18 Want Hy sê aan konings:

‘Julle is boos!’

en aan vername mense:

‘Julle is onregverdig.’

19 Dit maak nie vir Hom saak

hoe belangrik jy is nie.

Hy kies ook nie tussen ryk

en arm nie.

Hy het hulle almal gemaak.

20 Hulle sterf in ’n oomblik

teen middernag.

Die sterkstes word verwyder

sonder dat iemand

iets daaraan kan doen.

21 “Hy kyk na hoe mense leef;

Hy sien alles wat hulle doen.

22 Die kwaaddoener

kan in geen donker plek,

hoe donker ook al,

vir Hom wegkruip nie.

23 Dit is nie vir ’n mens

om te besluit

wanneer hy

in God se oordeel kom nie.

24 Hy vernietig sterk mense

sonder om iemand te vra

en stel ander aan in hulle plek.

25 Hy kyk wat hulle doen.

In die nag keer Hy hulle om

en vernietig hulle.

26 Hy straf hulle

vir hulle slegte dade

waar almal dit kan sien.

27 Hulle het mos opgehou

om Hom te volg.

Hulle het hulle nie

aan Hom gesteur nie.

28 Deur hulle toedoen

moes die armes

na Hom roep om hulp.

En God het dit gehoor.

Ja, Hy hoor altyd

die noodroep van mense.

29 Wanneer Hy stilbly,

wie kan Hom kritiseer?

As Hy Hom verberg,

wie kan Hom sien?

Hy besluit oor volke en mense.

30 Hy sorg dat ’n goddelose

nie oor mense regeer

en hulle in ’n valstrik lei nie.

31 “Hoekom sê mense

nie vir God:

‘Ek het gesondig,

maar ek sal nie weer sondig nie’?

32 Of: ‘Ek weet nie wat ek

verkeerd gedoen het nie.

Sê vir my sodat ek daarmee

kan ophou.’

33 Moet God optree

volgens jou eise

omdat jy weier

om jou te bekeer?

Jý moet kies, nie ek nie.

Deel jou wysheid met ons!

34 “Mense met begrip verklaar,

wyse mense wat my hoor,

sê vir my:

35 ‘Job praat sonder kennis.

Sy woorde is sonder insig.’

36 Job, jy verdien

die swaarste straf

vir jou bose praatjies.

37 Want nou het jy

by al jou ander sondes

ook opstand en godslastering

daarby gevoeg.”

1 Elihu het verder gesê:

2 “Dink jy dit is reg om te sê:

‘Ek is regverdig voor God’?

3 Tog het jy ook gevra:

‘Wat help dit

om reg te lewe?

Wat kan dit my baat

om nie te sondig nie?’

4 “Ek sal jou en al jou vriende

antwoord.

5 Kyk op in die lug,

sien die wolke

hoog bokant jou raak.

6 As jy sondig, hoe raak dit Hom?

Selfs as jy aanhou

om weer en weer sonde te doen,

wat doen dit aan Hom?

7 Of as jy reg optree,

wat beteken dit vir Hom?

Wat kan jy vir Hom gee?

8 Jou sondes raak net die mense

soos jy

en jou goeie dade

beïnvloed net ander mense.

9 “Mense roep om hulp

onder hulle swaar

verdrukking.

Hulle kreun onder die mag

van die sterkes.

10 Tog vra hulle nie:

‘Waar is God, ons Maker,

die Een wat ons

’n lied laat sing in die nag?

11 Waar is Hy

wat ons meer geleer het

as vir die diere

en ons slimmer gemaak het

as die voëls?’

12 Mense roep om hulp

en Hy antwoord nie

weens hulle boosheid

en hoogmoed.

13 Maar dit is verkeerd om te sê

God luister nie,

die Almagtige gee nie om nie.

14 Dit is nog meer vals om te sê

Hy sien nie wat aangaan nie.

Hy sal geregtigheid laat geskied

as jy net sal wag.

15 Maar roep jy uit teen Hom

omdat Hy nie in woede

reageer op sondaars nie

en nie weet van boosheid nie?

16 Job, jy het tevergeefs

geprotesteer.

Jy het gepraat soos ’n dwaas.”

1 Elihu het ook nog gesê:

2 “Laat my voortgaan,

en ek sal die waarheid

vir jou uitwys

in wat ek sê,

want ek is nog nie klaar

om God te verdedig nie!

3 Ek het baie voorbeelde

van die regverdigheid

van my Maker

wat ek aan jou kan voorhou.

4 “Wat ek gaan sê,

is die eerlike waarheid,

want ek is ’n man

met afgeronde kennis.

5 God is magtig,

tog verag Hy niemand nie!

Hy is magtig in sowel krag

as begrip.

6 Hy laat die kwaaddoener

nie lewe nie,

maar sorg vir regverdigheid

vir die verdrukte.

7 Sy oë is altyd

op die onskuldige,

Hy vestig en verhef hulle

vir altyd

saam met konings.

8 Maar as hulle moeilikheid het

en swaar verdruk word,

9 doen Hy moeite

om vir hulle die rede uit te wys,

naamlik hulle sonde

van hoogmoed.

10 So kry Hy hulle aandag

en sê vir hulle

dat hulle moet wegdraai

van die kwaad.

11 As hulle luister

en Hom gehoorsaam,

word hulle geseën

met voorspoed

deur hulle hele lewe.

12 Maar as hulle weier

om te luister,

sal hulle sterf in die geveg

en ondergaan

omdat hulle niks verstaan nie.

13 “Goddelose mense vertroetel

hulle woede.

Selfs wanneer Hy hulle straf,

weier hulle om te roep

om hulp.

14 Hulle sterf jonk.

Hulle lewe eindig

in skandelike dade.

15 Maar deur hulle swaarkry,

red Hy mense wat ly.

Want Hy gebruik hulle lyding

om hulle oë oop te maak.

16 “Ja, ook vir jou wou God

uit die gevaar lei.

Hy wou jou vrymaak.

Hy wou jou oorgenoeg gee

om van te lewe.

17 Maar jy is behep

met die oordeel

oor die goddelose.

Moenie bekommerd wees nie.

Regverdigheid sal seëvier.

18 Oppas dat voorspoed

jou nie verlei nie.

Moenie dat ’n groot

omkoopgeskenk

jou laat sondig nie.

19 Kan al jou geld en moeite

jou help in jou ellende?

20 Moenie wens

dat die nag kom nie.

Dis juis dan

dat mense vernietig word.

21 Wees waaksaam!

Draai weg van die kwaad!

God het juis swaarkry

oor jou gestuur

om jou weg te vat van sonde.”

Elihu herinner Job aan God se

mag

22 “God is almagtig.

Wie kan ’n mens leer

soos Hy?

23 Niemand kan Hom vertel

wat om te doen nie.

Niemand kan vir Hom sê:

‘U was verkeerd’ nie.

24 Nee, verheerlik liewer

sy magtige werke

en sing tot sy lof.

25 Elkeen het hierdie dinge

gesien,

maar net van ver af.

26 Kyk, God is verhewe

bokant ons begrip.

Sy jare is sonder einde.

27 “Hy trek waterdamp op

en laat dit val as reën.

28 Reën stort uit die wolke

en almal baat daarby.

29 Kan iemand verstaan

hoe die wolke uitsprei,

en die donderweer

rol deur die hemel?

30 Kyk hoe Hy die weerlig

rondom Hom laat blits.

Kyk hoe dit die diepsee verlig.

31 Deur sy magtige dade

regeer Hy oor die mense,

Hy sorg vir hulle met oorvloed.

32 Hy vul sy hande met weerlig

en gooi hulle af op sy teiken.

33 Die donderweer verkondig

sy teenwoordigheid.

Die storm kondig sy woede aan.”

1 “As ek hieraan dink,

bons en bewe my hart in my.

2 Luister na God se stem

in die donderweer

as dit voortrol van Hom af.

3 Dit rol deur die ganse hemel.

Sy weerlig slaan

in alle rigtings.

4 Dan kom die gebrul

van die donderweer,

die geweldige stem

van sy majesteit.

Hy hou nie die weerlig terug

wanneer Hy praat nie.

5 God se stem is glorieryk

in die donderweer.

Dis onmoontlik

om sy grootheid en mag

te bedink.

6 Hy laat die sneeu

val op die aarde,

en beveel die reën

om neer te stort.

7 Almal hou dan op om te werk

sodat hulle sy krag

kan aanskou.

8 Die wilde diere

skuil tussen rotse

of bly in hulle lêplekke.

9 Die storm kom uit sy blyplek.

Die wind bring groot koue.

10 Die asem van God

stuur die ys.

Die wye waters vries kliphard.

11 Hy laai die wolke met vog.

Hy verlig die wolke

met sy weerlig.

12 Die wolke draai en draai

soos Hy hulle beveel.

Hulle doen wat Hy beveel

oor die hele bewoonde aarde.

13 Hy laat dinge gebeur op aarde

as straf of as teken

van sy troue liefde.

14 “Luister hierna, Job.

Staan stil en bedink

die wonderdade van God.

15 Weet jy hoe God

die storm beheer

en sy weerlig laat flits

uit sy wolke?

16 Verstaan jy hoe die wolke

in die lug bly hang?

Dis die wonderlike werk

van Hom wat alles weet.

17 As jy vergaan van die hitte

in jou klere,

wanneer die suidewind gaan lê

en alles stil word,

18 weerkaats Hy die hitte

uit die hemelruim

soos ’n reuse spieël.

Kan jy dit doen?

19 “Jy dink mos jy weet so baie.

Leer ons

wat ons vir God moet sê.

Ons is te onkundig

om self te redeneer.

20 Moet ons vir Hom sê dat ons

met Hom wil praat?

Kan ons praat

as ons so deurmekaar is?

21 Ons kan nie in die son kyk

op ’n wolklose dag nie.

Dit skyn helder in die lug

wanneer al die wolke

weggewaai het.

22 Uit die noorde kom God

in goudglans.

Rondom Hom is

ontsagwekkende majesteit.

23 Ons kan ons nie voorstel

hoe magtig God is nie.

Tog is Hy so regverdig

en vol genade

dat Hy ons nie verdruk nie.

24 Geen wonder dat alle mense

Hom vrees nie.

Mense met ware wysheid

het ontsag vir Hom.”

Die Here daag Job uit

1 Toe het die Here

Job uit ’n stormwind

geantwoord:

2 “Wie is dit

wat my wysheid bevraagteken

met woorde van onkunde?

3 Staal jouself!

Ek sal die vrae stel,

en dan antwoord jy My.

4 “Waar was jy

toe Ek die fondasie

van die aarde gelê het?

Sê My as jy so baie weet!

5 Wie het die aarde opgemeet?

Jy weet tog seker!

En wie het die maatband

oor die aarde gespan?

6 Waarop rus die fondasie

van die aarde?

En wie het sy hoeksteen gelê?

7 Toe het al die môresterre

saamgesing

en die hemelse wesens*

het van vreugde gejuig.

8 “Wie het die grense van die see

vasgestel

toe dit uitgeborrel het

9 en Ek dit bedek het met wolke

en dik duisternis?

10 Ek het grense vir hom gestel.

Ek het hom

agter slot en grendel gesit.

11 Ek het gesê:

‘Jy mag tot hier kom,

en nie verder nie.

Hier moet jou trotse golwe breek.’

12 “Het jy ooit die môre beveel

om te verskyn?

Het jy die dag laat breek

in die ooste?

13 Het jy al die lig opdrag gegee

om oor die aarde te sprei

sodat die nag se boosheid

kan ophou?

14 Die aarde neem vorm aan

soos die lig toeneem.

Dit neem vorm aan

soos voue in ’n kledingstuk.

15 Die lig versteur die rooftog

van die kwaaddoener.

Hulle kan nie meer die arm lig

om geweld te pleeg nie.

16 “Was jy al by die fonteine

waar die see ontspring?

Het jy al daar rondgeloop

en sy dieptes verken?

17 Weet jy waar die ingang

van die doderyk is,

waar die donkerte skuil?

18 Begryp jy hoe groot

die aarde is?

Sê My as jy dit alles weet.

19 “Waar kom die lig vandaan?

En waarheen wyk

die donkerte?

20 Kan jy hulle terugvat

na hulle huis toe?

Weet jy hoe om daar uit te kom?

21 Natuurlik weet jy dit alles!

Jy is mos gebore

voor dit alles geskep is.

Jy het nou al soveel ervaring!

22 “Was jy al by die skatkamers

van die sneeu?

Het jy al gesien waar die hael

gebêre word?

23 Ek gaar dit op

vir ’n tyd van rampe,

vir die dag van stryd en oorlog.

24 Waar is die pad

na die oorsprong van lig?

Waar is die tuiste

van die oostewind?

25 Wie grawe ’n kanaal

vir die stortreën?

Wie maak ’n pad

vir die weerlig?

26 Wie giet reën

oor die droë grond,

in ’n woestyn

waar niemand woon nie?

27 Wie stuur die reën

wat die droë land natmaak

sodat groen gras uitspruit?

28 Het die reën ’n vader?

Waar kom dou vandaan?

29 Wie is die moeder van ys?

Wie gee geboorte aan ryp

uit die lug?

30 Dan word water so hard

soos ’n rots,

en die watervlak verys.

31 “Kan jy die Sewester vasknoop?

Of die bande van Orion losmaak?

32 Kan jy sorg dat die sterre

op die regte tyd opkom?

Kan jy die Beer met sy kleintjies

laat uitkom?

33 Ken jy die wette

van die natuur?

Weet jy hoe God

oor die aarde regeer?

34 “Kan jy met die wolke praat

sodat hulle begin reën?

35 Kan jy weerligstrale maak,

en dit laat tref soos jy wil?

36 Wie gee intuïsie en instink

aan die mens?

37 Wie is slim genoeg

om die wolke te tel?

Wie kan die waterkanne

van die hemel omkeer

38 wanneer die grond droog is

en die kluite kliphard?”

1 “Kan jy vir die leeuwyfie

prooi vang

wat genoeg sal wees

vir haar kleintjies

2 waar hulle lê en wag

in hulle wegkruipplek,

waar hulle skuil in die bosse?

3 Wie gee kos vir kraaie

as hulle kleintjies

na God roep

en ronddwaal

omdat hulle honger is?”

Die uitdaging van die Here

gaan voort

4 “Ken jy die tyd

wanneer die bergbokke lam?

Het jy gesien wanneer

die wildsbokke

kleintjies kry?

5 Weet jy hoeveel maande

hulle draagtyd is?

Weet jy wanneer hulle

moet lam?

6 Hulle krimp inmekaar

om geboorte te gee.

Hulle geboortepyne

is vinnig verby.

7 Die klein bokkies word groot

in die oop veld.

Hulle verlaat die ouers

en kom nie weer terug nie.

8 “Wie laat die wildedonkie

vry rondloop?

Wie maak sy harnas los?

9 Ek het hom laat leef in die wildernis.

Die soutvlaktes

is sy blyplek.

10 Hy lag vir die gewoel

in die stad.

Hy steur hom nie aan die geroep

van ’n drywer nie.

11 Hy wei in die berge

op soek na groen gras.

12 “Sal die buffel bereid wees

om in jou diens te staan?

Sal hy in die nag

op stal bly staan?

13 Kan jy hom inspan

en ’n harnas aansit?

Sal hy bereid wees

om vir jou ’n veld te ploeg?

14 Hy is baie sterk,

maar kan jy op hom vertrou

om jou werk vir jou te doen

as jy weggaan?

15 Kan jy op hom vertrou

om jou graan

huis toe te bring?

Sal hy dit op jou dorsvloer

neersit?

16 “Die volstruis klap haar vlerke

met trots.

Maar haar vere kan nie vergelyk

word

met dié van ’n ooievaar nie.

17 Sy lê haar eiers op die grond.

Hulle broei warm

in die grond.

18 Sy is nie bekommerd

dat iemand daarop kan trap

of dat wilde diere

dit kan vernietig nie.

19 Sy tree hardvogtig op

teenoor haar kuikens

asof hulle nie haar eie is nie.

Dit maak nie vir haar saak

of hulle sterf nie.

20 God het haar nie wysheid

of gesonde verstand

gegee nie.

21 Maar as sy haar vlerke optel

om te hardloop,

hardloop sy weg

vir die vinnigste perd

met sy ruiter.

22 “Het jy die perd

sy krag gegee,

of sy nek bedek

met maanhare?

23 Gee jy hom die vermoë

om te spring

soos ’n sprinkaan?

Hy maak almal bang

met sy trotse gesnork.

24 Hy kap die grond

met sy pote.

Hy is bly oor sy krag.

As hy in die geveg storm,

25 is hy vir niks bang nie.

Hy hardloop nie weg

van wapens nie.

26 Die pyle raas

rondom hom.

Spiese en swaarde

flits in die son.

27 Opgewonde kap sy pote

die grond.

Hy storm vorentoe

in die geveg

wanneer die trompet blaas.

28 Hy snork

as die trompet blaas,

van ver af

ruik hy die geveg.

Hy hoor hoe die offisiere

en soldate roep.

29 “Is dit op jou bevel

dat die valk hoog vlieg

en sy vlerke sprei

na die suide?

30 Gee jy bevel dat die arend

hoog moet vlieg

om sy nes te gaan bou?

31 Hy woon op ’n rotslys

en maak sy blyplek

op ’n hoë krans.

32 Van daar af soek hy sy kos.

Sy oë sien dit van ver af.

33 Sy kuikens

vreet bloederige vleis

van enige karkas.”

34 Die Here het vir Job gesê:

35 “Wil jy steeds redeneer

met die Almagtige?

Laat die een wat God aankla,

nou praat!”

Job reageer op die Here se

woorde

36 Job het toe die Here

geantwoord:

37 “Ek het dwase dinge gesê.

Hoe kan ek U antwoord?

Ek sit my hand op my mond.

38 Ek het een keer gepraat

en te veel gesê.

Ek het niks meer

om te sê nie.”

Die Here daag Job weer uit

1 Die Here het toe vir Job

uit ’n storm geantwoord:

2 “Gaan staan regop soos ’n man.

Ek wil ’n paar vrae aan jou stel.

Jy moet My antwoord.

3 “Wil jy sê

dat Ek verkeerd is?

Wil jy My

veroordeel

sodat jy geregverdig kan wees?

4 Is jy so sterk soos God?

Kan jy jou stem

uit die onweer laat hoor?

5 Laat jou gesag dan geld.

Tree op in jou koninklike

majesteit.

6 Gee uiting aan

jou woede

sodat dit oorkook

oor die hoogmoediges

en hulle verneder.

7 Vernietig slegte mense

met een blik.

Loop oor die goddeloses.

8 Begrawe almal in die stof.

Sluit hulle toe in die graf.

9 Selfs Ek sal jou dan prys,

want jy sal jou

deur jou eie krag kan red.

10 “Kyk na die seekoei*.

Ek het hom gemaak

net soos Ek jou gemaak het.

Hy vreet gras soos ’n bees.

11 Hy het ’n kragtige liggaam

met sterk spiere.

12 Sy stert is so reguit

soos ’n seder.

Sy boudspiere

is inmekaargevleg.

13 Sy bene

is soos bronspype.

Sy ledemate

so sterk soos yster.

14 Dit is ’n uitstekende

voorbeeld

van God se handewerk.

Net sy Maker

kan hom in toom hou.

15 Die berge lewer vir hom

voedsel,

en al die wilde diere speel daar.

16 Hy lê onder waterplante.

Hy skuil tussen die riete

in die moeras.

17 Hy skuil in die skadu

van die waterplante

tussen die wilgers

langs die rivier.

18 As die rivier in vloed is,

word hy nie bang nie.

Hy is rustig selfs as die Jordaan

rondom hom bruis.

19 Niemand kan hom

van voor af pak

en ’n ring in sy neus sit nie.”

Die Here daag Job weer uit

20 “Kan jy ’n krokodil*

met ’n hoek vang?

Kan jy ’n tou bind om sy bek?

21 Kan jy ’n lyn

steek deur sy neus

of sy kake met ’n haak deurboor?

22 Sal hy by jou pleit om genade,

of soebat om vir hom

jammer te wees?

23 Sal hy instem

om vir jou te werk?

Kan jy van hom ’n slaaf maak

vir die res van sy lewe?

24 Sal jy hom mak maak

soos ’n voëltjie,

of vir hom ’n leiband aansit

as ’n speelding vir jou dogters?

25 Sal handelaars hom wil koop?

Kan hulle hom verkoop

in hulle winkels?

26 Kan jy sy vel deurboor

met pyle,

of sy kop met ’n harpoen?

27 Lê gerus jou hand op hom!

Jy sal vir altyd

die geveg onthou

en dit nooit weer waag nie.

28 Jy probeer verniet

om hom te vang.

Die jagter is oorweldig

as hy hom net sien.”