Category: 1 KRONIEKE

Dawid neem ’n sensus op

1 Satan het teen Israel opgestaan en Dawid aangepor om ’n sensus van die Israeliete op te neem.

2 Dawid het opdrag aan Joab en sy offisiere gegee: “Gaan neem ’n sensus op van al die mense in die land, van Berseba in die suide tot Dan in die noorde. En bring dan vir my die uitslag sodat ek kan weet hoeveel mense daar is.”

3 Maar Joab het geantwoord: “Mag die Here sy volk honderd maal vermeerder! Maar hoekom, o Koning, wil u dit doen? Is hulle nie almal u dienaars nie? Waarom wil u dit doen? Hoekom moet u Israel laat sondig?”

4 Maar die koning het daarop aangedring dat Joab die sensus opneem. Daarom het Joab deur die hele Israel getrek om die volk te tel. Toe is hy terug Jerusalem toe.

5 Joab het die getal mense aan Dawid kom rapporteer. Daar was 1 100 000 mense wat militêre diens kon lewer in Israel, en 470 000 in Juda.

6 Joab het nie die stamme van Levi en Benjamin getel nie omdat die opdrag van die koning vir hom afskuwelik was.

Oordeel vir Dawid se sonde

7 God was baie ontevrede met die sensus, en Hy het Israel daarvoor gestraf.

8 Toe sê Dawid vir God: “Ek het baie teen U gesondig en moes nie die sensus opgeneem het nie. Vergewe my asseblief omdat ek hierdie dwase ding gedoen het!”

9 Die Here het met Gad, Dawid se siener, gepraat. Dit was die boodskap:

10 “Gaan sê vir Dawid: ‘Dit is wat die Here sê: Ek gaan jou drie keuses gee. Kies een van hierdie strawwe, en Ek sal dit doen.’”

11 Gad het by Dawid gekom en vir hom gesê: “Hierdie is die keuses wat die Here u gegee het.

12 U kan drie jaar van hongersnood kies, drie maande van verwoesting deur u vyande of drie dae van ’n swaar plaag waar die engel van die Here deur die hele land vernietiging bring. Dink hieroor na en laat my weet watter antwoord ek vir die Here moet gee.”

13 “Dit is ’n desperate situasie!” het Dawid vir Gad geantwoord. “Maar laat my eerder in die hande van die Here val, want sy genade is baie groot. Moet my tog nie in mense se hande laat val nie.”

14 Die Here het ’n plaag oor Israel gestuur, en 70 000 mense van Israel is dood as gevolg daarvan.

15 En God het ’n engel na Jerusalem gestuur om dit te verwoes. Maar net toe die engel gereed was om die verderf te saai, het die Here berou gekry oor die ellende en vir die engel gesê: “Dis genoeg! Trek nou jou hand terug.” Op daardie oomblik was die engel van die Here by die dorsvloer van Arauna, die Jebusiet.

16 Dawid het opgekyk en die engel van die Here sien staan tussen hemel en aarde met sy ontblote swaard wat oor Jerusalem uitgestrek is. Toe het Dawid en die leiers van Israel in sak en as op die grond neergeval.

17 En Dawid het vir God gesê: “Ek was die een wat die sensus beveel het! Ek is die een wat gesondig het en hierdie baie verkeerde ding gedoen het! Maar hierdie mense is onskuldig. Wat het hulle gedoen? O Here my God, laat u woede teen my en my familie ontbrand, maar moenie u volk vernietig nie!”

Dawid bou ’n altaar

18 Die engel van die Here het vir Gad gesê om Dawid te beveel om ’n altaar vir die Here te gaan bou op die dorsvloer van Arauna, die Jebusiet.

19 Dawid het gedoen wat die Here hom deur Gad beveel het.

20 Arauna was besig om koring te dors toe hy omdraai en die engel sien. Sy vier seuns wat by hom was, het weggehardloop en gaan wegkruip.

21 Toe Arauna sien dat die koning aankom, het hy sy dorsvloer verlaat en voor Dawid met sy gesig na die grond gebuig.

22 Dawid sê toe vir Arauna: “Laat my asseblief hierdie dorsvloer vir sy volle koopprys koop! Ek wil ’n altaar vir die Here hier bou sodat Hy hierdie plaag sal stop.”

23 “Vat dit, o Koning, en gebruik dit soos u wil,” het Arauna vir Dawid gesê. “Hier is ook beeste vir brandoffers en u kan die dorsgereedskap vir hout gebruik om die vuur op die altaar te maak. En vat die koring as ’n spysoffer. Ek wil dit alles vir u gee!”

24 Maar die koning het vir Arauna gesê: “Nee, ek dring daarop aan om te betaal wat dit werd is. Ek kan nie wat joune is, vat en vir die Here gee nie. Ek sal nie ’n brandoffer bring wat my niks kos nie!”

25 Dawid het Arauna toe byna sewe kilogram goud betaal vir die dorsvloer.

26 Dawid het daar ’n altaar vir die Here gebou en brandoffers en dankoffers geoffer. Terwyl Dawid gebid het, het die Here hom geantwoord met vuur uit die hemel wat sy offers op die altaar verbrand het.

27 Toe het die Here met die engel gepraat, en hy het sy swaard in die skede teruggesteek.

28 Dawid het op daardie tydstip gesien dat die Here sy gebed geantwoord het. Daarom het hy aangehou om offers op die dorsvloer van Arauna, die Jebusiet, te offer.

29 In daardie stadium was die tabernakel van die Here en die altaar wat Moses in die woestyn gemaak het, op die hoogte in Gibeon.

30 Maar Dawid wou nie daarheen gaan om God te raadpleeg nie omdat hy bang was vir die uitgetrekte swaard van die engel van die Here.

1 Dawid het gesê: “Hier is die plek vir die huis van die Here God en die plek vir die altaar vir Israel se brandoffers!”

Voorbereidings vir die tempel

2 Dawid het beveel dat al die vreemdelinge wat in Israel leef, bymekaar moet kom. Hy het hulle aangestel om die blokke klip reg te kap om die tempel van God mee te bou.

3 Dawid het ook groot hoeveelhede yster verskaf vir die spykers wat nodig sou wees vir die poortdeure en vir kramme, en koper wat soveel was dat dit nie geweeg kon word nie.

4 Daarby het hy ontelbaar baie sederblokke verskaf, want die mense van Sidon en Tirus het vir Dawid groot hoeveelhede sederhout gebring.

5 Want Dawid het gesê: “My seun Salomo is nog jonk en onervare, en die huis wat vir die Here gebou gaan word, moet indrukwekkend en groot wees, ’n roem en ’n sieraad vir alle lande. Daarom tref ek vir hom die voorbereidings.” Daarom het Dawid voor sy dood al groot hoeveelhede boumateriaal bymekaargemaak.

6 Daarna het Dawid sy seun Salomo laat haal en vir hom verduidelik dat hy ’n tempel vir die Here, die God van Israel, moes bou.

7 “Ek wou ’n tempel tot eer van die Here my God bou,” het Dawid vir hom gesê.

8 “Maar die Here het vir my gesê: ‘Jy het baie mense doodgemaak in die groot oorloë waarin jy geveg het. Omdat jy so baie bloed voor My op die grond vergiet het, is jy nie die een wat ’n tempel tot my eer sal bou nie.

9 Maar jy sal ’n seun hê wat vrede en rus in sy tyd sal beleef. Ek sal hom vrede met sy vyande en al die omliggende lande gee. Sy naam sal Salomo wees, en Ek sal vrede en rus in Israel gedurende sy regering gee.

10 Hy is die een wat ’n tempel tot my eer sal bou. Hy sal my seun wees, en Ek sal sy Vader wees. Ek sal die troon van sy koningskap oor Israel vir altyd bevestig.’

11 “Nou, my seun, mag die Here met jou wees en jou suksesvol maak terwyl jy die instruksies volg wanneer jy die tempel van die Here jou God bou.

12 Mag die Here jou ook wysheid en begrip gee sodat jy die opdragte van die Here jou God sal gehoorsaam terwyl jy oor Israel regeer.

13 Want as jy sorgvuldig al die opdragte en bepalings uitvoer wat die Here deur Moses vir Israel gegee het, sal jy suksesvol wees. Daarom, wees sterk en vol moed. Moenie bang of moedeloos word nie.

14 “Ek het hard gewerk om materiaal vir die bou van die tempel van die Here te verskaf – byna drie en ’n half ton goud en 34 000 ton silwer, en soveel yster en koper dat dit nie geweeg kan word nie. Ek het ook hout en klip bymekaargemaak, alhoewel jy meer nodig kan kry.

15 Jy het baie vaardige klipkappers, ambagsmanne in klip en hout, en kunstenaars van elke soort.

16 Hulle is vaardige goudsmede, silwersmede en bewerkers van koper en die yster. Begin nou met die werk, en mag die Here met jou wees!”

17 Dawid het al die leiers in Israel beveel om sy seun Salomo by te staan.

18 “Die Here julle God is met julle,” het hy verklaar. “Hy het julle rus gegee van die omringende volke. Hy het al die inwoners van die land aan my oorgegee, en hulle is nou onderdane van die Here en sy volk.

19 Soek nou die Here julle God met julle hele hart. Bou die heiligdom van die Here God sodat julle die verbondsark van die Here en die heilige voorwerpe van God in die tempel kan bring om die Here te eer.”

Pligte van die Leviete

1 Toe Dawid al ’n ou man was, by die einde van sy lewe, het hy sy seun Salomo as koning oor Israel aangestel.

2 Dawid het al die leiers van Israel bymekaargeroep, saam met die priesters en Leviete, vir die kroningseremonie.

3 Al die Leviete wat 30 jaar en ouer was, is getel, en hulle was 38 000 in totaal.

4 Toe het Dawid gesê: “Van hulle moet 24 000 toesig hou oor die werk by die tempel van die Here. En 6 000 moet as amptenare en regters werk.

5 4 000 moet as poortwagters werk en nog 4 000 moet die Here loof met die musiekinstrumente wat ek gemaak het.”

6 Toe het Dawid die Leviete in afdelings opgedeel, genoem na die drie seuns van Levi, naamlik Gerson, Kehat en Merari.

Die Gersoniete

7 Die Gersoniete se families is gedefinieer deur hulle afstamming van Ladan en Simi, seuns van Gerson.

8 Drie van die afstammelinge van Ladan was Jegiël, die familieleier, Setam en Joël.

9 Drie van die afstammelinge van Simi was Selomit, Gasiël en Haran. Hulle was die leiers van die familie van Ladan.

10 Vier ander afstammelinge van Simi was Jagat, Sisa, Jeüs en Beria.

11 Jagat was die familieleier, en Sisa was volgende. Jeüs en Beria is as een familie getel omdat nie een van hulle baie seuns gehad het nie.

Die Kehatiete

12 Die afstammelinge van Kehat het Amram, Jishar, Hebron en Ussiël ingesluit.

13 Die seuns van Amram was Aäron en Moses. Aäron en sy afstammelinge is afgesonder om die hoogheilige dinge te wy, om offers in die Here se teenwoordigheid te bring, om die Here te dien en om altyd seëninge in sy Naam uit te spreek.

14 Wat Moses, die man van God betref, sy seuns is ingesluit by die stam van Levi.

15 Die seuns van Moses was Gersom en Eliëser.

16 Die afstammelinge van Gersom het Subael, die familieleier, ingesluit.

17 Eliëser het net een seun gehad, Regabja, wat die familieleier was. Regabja het baie afstammelinge gehad.

18 Die afstammelinge van Jishar het Selomit, die familieleier, ingesluit.

19 Die afstammelinge van Hebron was Jeria, die familieleier, Amarja, die tweede, Jagasiël, die derde, en Jekamam, die vierde.

20 Die afstammelinge van Ussiël was Miga, die familieleier, en Jissija, die tweede.

Die Merariete

21 Die afstammelinge van Merari was Magli en Musi.

Die seuns van Magli was Eleasar en Kis.

22 Eleasar is dood sonder om ’n seun te hê. Hy het net dogters gehad. Sy dogters is met hulle nefies, die seuns van Kis, getroud.

23 Die drie seuns van Musi was Magli, Eder en Jeremot.

24 Hulle was almal die afstammelinge van Levi volgens hulle families, die familieleiers, sorgvuldig aangeteken volgens hulle name. Elkeen moes twintig jaar of ouer wees om te kwalifiseer om in die huis van die Here te dien.

25 Want Dawid het gesê: “Die Here, die God van Israel, het ons vrede gegee, en Hy sal vir altyd in Jerusalem woon.

26 Nou hoef die Leviete nie meer die tabernakel en al sy voorwerpe van plek tot plek te dra nie.”

27 Dit was volgens Dawid se finale instruksies dat al die Leviete van twintig en ouer vir die dienswerk geregistreer is.

28 Die werk van die Leviete was om die priesters, die afstammelinge van Aäron, by te staan wanneer hulle in die huis van die Here dien. Hulle moes ook sorg dra vir die voorhowe en sykamers, help om die reinigingseremonies uit te voer en op baie ander maniere in die huis van God te werk.

29 Hulle was in beheer van die offerbrode wat op die tafel gesit is, die fynmeel vir die spysoffer, die ongesuurde platkoeke, die gebakte offers en die offers wat met olie gemeng is.

Hulle was ook verantwoordelik om al die mate en gewigte te kontroleer.

30 En elke môre en aand het hulle voor die Here gestaan om Hom te loof en te prys.

31 Hulle het ook met die brandoffers gehelp wat op Sabbatdae vir die Here gebring is, en op nuwemane en feestye.

Die regte getal Leviete het te alle tye in die Here se teenwoordigheid gedien, en hulle het al die prosedures gevolg wat vir hulle voorgeskryf is.

32 So het die Leviete onder toesig van die priesters, aan wie hulle verwant was, oor die tent van samekoms en die heiligdom gewaak en getrou hulle pligte in die tempel van die Here uitgevoer.

Pligte van die priesters

1 Dit is hoe Aäron se afstammelinge, die priesters, in groepe ingedeel was vir dienswerk. Die seuns van Aäron was Nadab, Abihu, Eleasar en Itamar.

2 Maar Nadab en Abihu het voor hulle pa gesterf, en hulle het geen seuns gehad nie. Net Eleasar en Itamar was oor om as priesters te dien.

3 Met die hulp van Sadok, wat ’n afstammeling van Eleasar was, en van Agimelek, wat ’n afstammeling van Itamar was, het Dawid hulle in groepe ingedeel volgens hulle verskillende dienswerke.

4 Eleasar se nageslag is in sestien groepe verdeel en Itamar in agt groepe, want daar was meer familieleiers tussen die afstammelinge van Eleasar.

5 Alle take is tussen die groepe verdeel deur middel van die gewyde lot sodat niemand voorkeur gekry het nie, want daar was baie bekwame amptenare wat God in die heiligdom kon dien tussen die afstammelinge van beide Eleasar en Itamar.

6 Die sekretaris Semaja, seun van Netanel, ’n Leviet, het al die name opgeteken in die teenwoordigheid van die koning, die leiers, Sadok, die priester, Agimelek, seun van Abjatar, en die familieleiers van die priesters en Leviete. Die afstammelinge van Eleasar en Itamar is om die beurt met die lot aangewys.

7 Die eerste lot het op Jojarib geval. Die tweede het op Jedaja geval.

8 Die derde het op Garim geval. Die vierde het op Seorim geval.

9 Die vyfde het op Malkija geval. Die sesde het op Mijamin geval.

10 Die sewende het op Kos geval. Die agtste het op Abia geval.

11 Die negende het op Jesua geval. Die tiende het op Sekanja geval.

12 Die elfde het op Eljasib geval. Die twaalfde het op Jakim geval.

13 Die dertiende het op Guppa geval. Die veertiende het op Jesebab geval.

14 Die vyftiende het op Bilga geval. Die sestiende het op Immer geval.

15 Die sewentiende het op Gesir geval. Die agtiende het op Pisses geval.

16 Die negentiende het op Petagja geval. Die twintigste het op Esegiël geval.

17 Die 21ste het op Jakin geval. Die 22ste het op Gamul geval.

18 Die 23ste het op Delaja geval. Die 24ste het op Maäsja geval.

19 Elke groep het sy pligte in die huis van die Here uitgevoer volgens die prosedures wat hulle voorouer Aäron vir hulle voorgeskryf het, soos die Here, die God van Israel, hom beveel het.

Familieleiers van die Leviete

20 Hier is die ander familieleiers wat van Levi afgestam het:

Van die afstammelinge van Amram was Subael die leier.

Van die afstammelinge van Subael was Jegdeja die leier.

21 Van die afstammelinge van Regabja was Jissija die leier.

22 Van die afstammelinge van Jissija was Selomit die leier.

Van die afstammelinge van Selomit was Jagat die leier.

23 Van die afstammelinge van Hebron was Jerija die leier, Amarja die tweede in bevel, Jagasiël die derde en Jekamam die vierde.

24 Van die afstammelinge van Ussiël was Miga die leier.

Van die afstammelinge van Miga was Samir die leier,

25 saam met Jissija, die broer van Miga.

Van die afstammelinge van Jissija was Sagaria die leier.

26 Van die afstammelinge van Merari was Magli en Musi die leiers.

Van die afstammelinge van Jaäsija was Beno die leier.

27 Van die afstammelinge van Merari was die leiers Soham, Sakkur en Ibri.

28 Van die afstammelinge van Magli was Eleasar die leier, maar hy het nie seuns gehad nie.

29 Van die afstammelinge van Kis was Jeragmeël die leier.

30 Van die afstammelinge van Musi was Magli, Eder en Jerimot die leiers.

Hierdie was almal die afstammelinge van Levi volgens hulle families.

31 Soos die afstammelinge van Aäron is hulle ook aan dienswerke toegewys deur middel van die gewyde lot, sonder om ouderdom of rang in ag te neem.

Dit is in die teenwoordigheid van koning Dawid, Sadok, Agimelek en die familieleiers van die priesters en Leviete gedoen.

Pligte van die musikante

1 Dawid en die leërhoofde het mans uit die families van Asaf, Heman en Jedutun aangestel om God se boodskappe te verkondig terwyl daar op siters, harpe en simbale gespeel word. Hier is die lys van hulle name en hulle dienswerke:

2 Van die seuns van Asaf was daar Sakkur, Josef, Netanja en Asarela. Hulle het gewerk onder leiding van hulle pa, Asaf, wat God se boodskappe op bevel van die koning verkondig het.

3 Jedutun het ses seuns gehad: Gedalja, Seri, Jesaja, Simi, Gasabja en Mattitja. Hulle het onder leiding van hulle pa, Jedutun, gewerk wat God se boodskappe verkondig het terwyl die siter gespeel is, en dank en lof aan die Here geoffer is.

4 Heman se seuns was Bukkija, Mattanja, Ussiël, Subael, Jerimot, Gananja, Ganani, Eliata, Giddalti, Romamti-Eser, Josbekasa, Malloti, Hotir en Magasiot.

5 Hulle almal was die seuns van Heman, die koning se siener, want God het hom geëer met veertien seuns en drie dogters.

6 Al hierdie mans het onder leiding van hulle pa’s gewerk terwyl hulle in die huis van die Here musiek gemaak het.

Hulle verantwoordelikhede het ingesluit dat hulle die simbale, harpe en siters bespeel het in die huis van God. Asaf, Jedutun en Heman het direk aan die koning gerapporteer.

7 Hulle en hulle families is almal opgelei om voor die Here musiek te maak. Elkeen van hulle, 288 in totaal, was ’n bedrewe musikant.

8 Die musikante is vir ’n bepaalde dienstermyn aangestel deur die gewyde lot te werp, sonder om in ag te neem hoe oud iemand was en of hy ’n meester of student was.

9 Die eerste lot het op Josef van die Asafgroep geval, en twaalf van sy seuns en bloedverwante.

Die tweede lot het op Gedalja geval, hy en twaalf van sy seuns en bloedverwante.

10 Die derde lot het op Sakkur geval, hy en twaalf van sy seuns en bloedverwante.

11 Die vierde lot het op Seri geval, hy en twaalf van sy seuns en bloedverwante.

12 Die vyfde lot het op Netanja geval, hy en twaalf van sy seuns en bloedverwante.

13 Die sesde lot het op Bukkija geval, hy en twaalf van sy seuns en bloedverwante.

14 Die sewende lot het op Asarela geval, hy en twaalf van sy seuns en bloedverwante.

15 Die agtste lot het op Jesaja geval, hy en twaalf van sy seuns en bloedverwante.

16 Die negende lot het op Mattanja geval, hy en twaalf van sy seuns en bloedverwante.

17 Die tiende lot het op Simi geval, hy en twaalf van sy seuns en bloedverwante.

18 Die elfde lot het op Asarel geval, hy en twaalf van sy seuns en bloedverwante.

19 Die twaalfde lot het op Gasabja geval, hy en twaalf van sy seuns en bloedverwante.

20 Die dertiende lot het op Subael geval, hy en twaalf van sy seuns en bloedverwante.

21 Die veertiende lot het op Mattitja geval, hy en twaalf van sy seuns en bloedverwante.

22 Die vyftiende lot het op Jeremot geval, hy en twaalf van sy seuns en bloedverwante.

23 Die sestiende lot het op Gananja geval, hy en twaalf van sy seuns en bloedverwante.

24 Die sewentiende lot het op Josbekasa geval, hy en twaalf van sy seuns en bloedverwante.

25 Die agtiende lot het op Ganani geval, hy en twaalf van sy seuns en bloedverwante.

26 Die negentiende lot het op Malloti geval, hy en twaalf van sy seuns en bloedverwante.

27 Die twintigste lot het op Eliata geval, hy en twaalf van sy seuns en bloedverwante.

28 Die 21ste lot het op Hotir geval, hy en twaalf van sy seuns en bloedverwante.

29 Die 22ste lot het op Giddalti geval, hy en twaalf van sy seuns en bloedverwante.

30 Die 23ste lot het op Magasiot geval, hy en twaalf van sy seuns en bloedverwante.

31 Die 24ste lot het op Romamti-Eser geval, hy en twaalf van sy seuns en bloedverwante.

Pligte van die poortwagters

1 Hier is die afdelings van die poortwagters: Van die Koragiete was daar Meselemja, seun van Kore, uit die geslag van Asaf.

2 Die seuns van Meselemja was Sagaria, die oudste, Jediael, die tweede, Sebadja, die derde, Jatniël, die vierde,

3 Elam, die vyfde, Joganan, die sesde, en Eljehoënai, die sewende.

4 Die seuns van Obed-Edom was Semaja, die oudste, Josabad, die tweede, Joag, die derde, Sakar, die vierde, Netanel, die vyfde,

5 Ammiël, die sesde, Issaskar, die sewende, en Peülletai, die agtste. God het Obed-Edom ryklik geseën.

6 Obed-Edom se seun Semaja het uiters bekwame seuns gehad wat posisies van groot gesag in die familiegroep verwerf het.

7 Hulle name was Otni, Refael, Obed en Elsabad. Hulle familie, Elihu en Semakja, was ook bekwame mans.

8 Hulle almal was afstammelinge van Obed-Edom, insluitende hulle seuns en kleinseuns, 62 in totaal. Hulle was bekwame mans, goed gekwalifiseer vir hulle werk.

9 Meselemja se agtien seuns en families was ook bekwame mans.

10 Gosa van die Merarigroep het Simri as die leier tussen sy seuns aangestel, alhoewel hy nie die oudste was nie.

11 Sy ander seuns was Gilkija, die tweede, Tebalja, die derde, en Sagaria, die vierde. Gosa se familie wat as poortwagters gedien het, was dertien in totaal.

12 Hierdie afdelings van die poortwagters is vernoem na hulle familiehoofde, en soos die ander Leviete het hulle in die huis van die Here gedien.

13 Hulle is as families aangestel vir poortdiens by die verskillende ingange, sonder om ouderdom of opleiding in ag te neem, want dit is deur die gewyde lot bepaal.

14 Die verantwoordelikheid vir die oostelike ingang het op Meselemja en sy groep geval. Die noordelike ingang is toegeken aan sy seun Sagaria, ’n man van uitsonderlike wysheid.

15 Die suidelike ingang het na Obed-Edom gegaan, en sy seuns was in beheer van die pakhuise.

16 Aan Suppim en Gosa is die westelike ingang toegeken en ook die ingang wat na die tempel lei.

17 Ses Leviete is vir elke dag aan die oostelike ingang toegeken, vier vir die noordelike ingang, vier vir die suidelike ingang en twee vir die pakhuise.

18 Ses is vir die westelike ingang toegeken, vier vir die ingang wat na die tempel lei en twee vir die voorhof.

19 Dit was die afdelings van die poortwagters van die familiegroepe van Korag en Merari.

Tesouriers en ander amptenare

20 Ander Leviete wat deur Agija gelei is, was in beheer van die skatkamers van die huis van God en die pakhuise.

21 Van die familie van Ladan in die Gersonfamilie was Jegiël die leier.

22 Die seuns van Jegiël, Setam en Joël, was in beheer van die skatkamers van die huis van die Here.

23 Hier is die leiers wat afgestam het van Amram, Jishar, Hebron en Ussiël:

24 Van die familiegroep van Amram was Sebael, ’n afstammeling van Gersom, seun van Moses, die hoofamptenaar van die skatkamers.

25 Sy familie stam af van Eliëser deur Regabja, Jesaja, Joram, Sikri en Selomit.

26 Selomit en sy familie was in beheer van die skatkamers waarin alles gehou is wat koning Dawid, die familieleiers, die generaals, kapteins en ander offisiere van die leër aan die Here gewy het.

27 Hierdie mans het deel van die buit wat hulle in oorloë gekry het, gewy om die huis van die Here in stand te hou.

28 Selomit en sy familie het ook gesorg vir die artikels wat aan die Here gewy is deur Samuel, die siener, Saul, seun van Kis, Abner, seun van Ner, en Joab, seun van Seruja. Al die ander gewyde artikels was ook in hulle sorg.

29 Van die Jisharfamilie het Kenanja gekom. Hy en sy seuns is aangestel om buite die tempel as opsigters en regters in Israel te dien.

30 Van die Hebronfamilie het Gasabja gekom. Hy en sy familie, 1 700 bekwame mans, was in beheer van die Israelitiese grond wes van die Jordaanrivier. Hulle was verantwoordelik vir alle sake wat verband gehou het met die dinge van die Here en die diens van die koning in daardie gebied.

31 Van die Hebronfamilie het ook Jerija gekom. Hy was volgens die geslagsregister die leier van die Hebroniete. In die 40ste jaar van Dawid se regering is die rekords ondersoek en bekwame mans van die Hebronfamilie is by Jaser in Gilead gevind.

32 Jerija het 2 700 bekwame mans uit sy familie gehad. Koning Dawid het hulle na die oostekant van die Jordaanrivier gestuur en in beheer geplaas van die stamme van Ruben, Gad en die halwe stam van Manasse. Hulle was verantwoordelik vir alles wat verband hou met die dinge van God en die diens van die koning.

Militêre bevelvoerders en

afdelings

1 Dit is die lys van Israel se familiehoofde, generaals en offisiere wat die koning gedien het deur die weermagafdelings te lei wat elke maand van die jaar aan diens was. Elke afdeling het vir een maand gedien, en bestaan uit 24 000 soldate.

2 Jasobam, seun van Sabdiël, was bevelvoerder van die eerste afdeling, wat die eerste maand aan diens was. Daar was 24 000 soldate in sy afdeling.

3 Hy was ’n afstammeling van Peres en was in beheer van al die offisiere vir die eerste maand.

4 Dodai, ’n afstammeling van Agoag, was bevelvoerder van die tweede afdeling, wat die tweede maand aan diens was. Daar was 24 000 soldate in sy afdeling, en Miklot was sy hoofoffisier.

5 Benaja, seun van Jojada, die hoëpriester, was bevelvoerder van die derde afdeling, wat die derde maand aan diens was. Daar was 24 000 soldate in sy afdeling.

6 Hierdie Benaja was in beheer van Dawid se elite militêre groep bekend as die Dertig. Sy seun, Ammisabad, was sy hoofoffisier.

7 Asael, broer van Joab, was bevelvoerder van die vierde afdeling, wat die vierde maand aan diens was. Daar was 24 000 soldate in sy afdeling. Asael is deur sy seun Sebadja opgevolg.

8 Samhut, die Jisragiet, was bevelvoerder van die vyfde afdeling, wat die vyfde maand aan diens was. Daar was 24 000 soldate in sy afdeling.

9 Ira, seun van Ikkes van Tekoa, was bevelvoerder van die sesde afdeling, wat die sesde maand aan diens was. Daar was 24 000 soldate in sy afdeling.

10 Geles, ’n afstammeling van Efraim uit Pelon, was bevelvoerder van die sewende afdeling, wat die sewende maand aan diens was. Daar was 24 000 soldate in sy afdeling.

11 Sibbekai, ’n afstammeling van Gusa, was bevelvoerder van die agtste afdeling, wat die agtste maand aan diens was. Daar was 24 000 soldate in sy afdeling.

12 Abiëser van Anatot, bevelvoerder van die negende afdeling, was die negende maand aan diens. Daar was 24 000 soldate in sy afdeling.

13 Marai, ’n afstammeling van Sera uit Netofa was bevelvoerder van die tiende afdeling, wat die tiende maand aan diens was. Daar was 24 000 soldate in sy afdeling.

14 Benaja van Piraton in Efraim was bevelvoerder van die elfde afdeling, wat die elfde maand aan diens was. Daar was 24 000 soldate in sy afdeling.

15 Geled, ’n afstammeling van Otniël uit Netofa, was bevelvoerder van die twaalfde afdeling, wat die twaalfde maand aan diens was. Daar was 24 000 soldate in sy afdeling.

Stamleiers

16 Die volgende was die stamme van Israel en hulle leiers:

Stam Leier

Ruben Eliëser,

seun van Sikri.

Simeon Safatja,

seun van Maäka.

17 Levi Gasabja,

seun van Kemuel.

Aäron (priesters) Sadok.

18 Juda Elihu,

’n broer van Dawid.

Issaskar Omri,

seun van Migael.

19 Sebulon Jismaja,

seun van Obadja.

Naftali Jerimot,

seun van Asriël.

20 Efraim Hosea,

seun van Asasja.

Manasse-wes Joël,

seun van Pedaja.

21 Manasse-oos Jiddo,

seun van Sagaria.

Benjamin Jaäsiël,

seun van Abner.

22 Dan Asarel,

seun van Jerogam.

Hulle was die leiers van die stamme van Israel.

23 Toe Dawid die sensus opgeneem het, het hy nie mense getel wat jonger as twintig was nie omdat die Here belowe het dat Hy Israel soveel sal maak soos die sterre aan die hemel.

24 Joab, Seruja se seun, het met die sensus begin, maar dit nooit voltooi nie omdat die woede van God teen Israel ontbrand het. Die finale totale is nooit in koning Dawid se amptelike rekords aangeteken nie.

Amptenare van Dawid se

regering

25 Asmawet, seun van Adiël, was in beheer van die tempel se skatkamers.

Jonatan, seun van Ussia, was in beheer van die streke se skatkamers in al die dorpe, dorpies en vestings van Israel.

26 Esri, seun van Kelub, was in beheer van die arbeiders wat die koning se landerye bewerk het.

27 Simi van Rama was in beheer van die koning se wingerde.

Sabdi van Sefam was verantwoordelik vir die druiwe en die voorsiening van wyn.

28 Baäl-Ganan van Geder was in beheer van die koning se olyfboorde en wildevyebome in die vlaktes van Juda.

Joas was verantwoordelik vir die olyfolievoorrade.

29 Sitrai van Saron was in beheer van die vee op die Saronvlakte.

Safat, seun van Adlai, was verantwoordelik vir die vee in die vlaktes.

30 Obil, die Ismaeliet, was in beheer van die kamele.

Jegdeja van Meronot was in beheer van die donkies.

31 Jasis, die Hagareër, was in beheer van die koning se kleinvee.

Al hierdie amptenare was opsigters oor koning Dawid se eiendom.

32 Jonatan, Dawid se oom, was ’n wyse raadgewer vir die koning, ’n man van groot insig en ’n sekretaris. Jegiël, die Gakmoniet, was verantwoordelik vir die onderrig van die koning se seuns.

33 Agitofel was die koning se raadgewer. Gusai, die Arkiet, was die koning se vriend.

34 Agitofel is opgevolg deur Jojada, seun van Benaja, en Abjatar. Joab was die hoof van Israel se weermag.

Dawid se instruksies aan

Salomo

1 Dawid het al die amptenare van Israel na Jerusalem toe ontbied, die stamleiers, bevelvoerders van die twaalf leërgroepe, die ander generaals en kapteins, opsigters oor die koninklike eiendom en vee, paleisamptenare, magtige manne en ander soldate in die koninkryk.

2 Koning Dawid het opgestaan en hulle toegespreek: “My broers en my volk! Dit was my begeerte om ’n huis vir die verbondsark van die Here te bou om as ’n voetbankie vir ons God te dien. Ek het voorbereidings getref om dit te bou.

3 Maar God het vir my gesê: ‘Jy mag nie ’n tempel bou om my Naam te eer nie, want jy is ’n soldaat wat baie bloed vergiet het.’

4 “Tog het die Here, die God van Israel, my uit al my pa se familielede gekies om vir altyd koning oor Israel te wees. Hy het die stam Juda gekies om te regeer, en uit al die families van Juda het Hy my pa se familie gekies, en Hy het besluit om my uit my pa se familie koning te maak oor die hele Israel.

5 Die Here het my baie kinders gegee, en onder hulle het Hy Salomo gekies om ná my op die troon van sy koninkryk van Israel te sit.

6 Hy het vir my gesê: ‘Jou seun Salomo sal my tempel en my voorhowe bou, want Ek het hom as my seun uitgekies, en Ek sal sy Vader wees.

7 As hy aanhou om my gebooie en regulasies te gehoorsaam soos hy nou doen, sal Ek sy koninkryk vir altyd bevestig.’

8 “Daarom gee ek nou hierdie opdrag voor die hele Israel, die Here se gemeente, terwyl God my getuie is: ‘Wees versigtig om al die gebooie van die Here julle God te gehoorsaam sodat julle hierdie goeie land kan besit en vir julle kinders nalaat as ’n permanente besitting.’

9 “En jy, Salomo, my seun, sorg dat jy die God van jou pa leer ken. Dien en aanbid Hom met jou hele hart en met ’n gewillige verstand. Want die Here sien elke hart en verstaan en ken elke plan en gedagte. As jy na Hom soek, sal jy Hom vind. Maar as jy Hom verlaat, sal Hy jou vir altyd verwerp.

10 Neem dit nou ernstig op. Die Here het jou verkies om ’n tempel as sy heiligdom te bou. Wees sterk en doen die werk.”

11 Toe het Dawid aan sy seun Salomo die planne gegee vir die voorportaal van die tempel, die ander geboue, die skatkamers, die bovertrekke, die binnevertrekke, die vertrek van die versoendeksel

12 en van alles wat hy in gedagte gehad het vir die voorhowe van die Here se tempel, die buitenste kamers, die skatkamers van God se tempel en die kamers vir die gewyde offers.

13 Die koning het ook vir Salomo instruksies gegee oor die dienswerk van die verskillende afdelings priesters en Leviete in die tempel van die Here. Hy het spesifikasies gegee vir die artikels in die Here se tempel wat vir aanbidding en diens gebruik moes word.

14 Dawid het instruksies gegee oor hoeveel goud en silwer vir die noodsaaklike artikels gebruik moes word.

15 Hy het ook vir Salomo gesê watter gewig in goud nodig was vir die goue kandelare en lampe, en hoeveel silwer vir die silwerkandelare en -lampe nodig was, ooreenkomstig hoe elkeen gebruik sou word.

16 Hy het ook die hoeveelheid goud aangedui vir elke tafel waarop die heilige brode gesit moes word, en die hoeveelheid silwer vir ander tafels.

17 Dawid het ook die hoeveelheid goud bepaal vir die vurke, komme en kanne wat van suiwer goud gemaak moes word, en vir die goue bekers, en die hoeveelheid silwer vir die silwerbekers.

18 Laastens het hy ook die hoeveelheid gesuiwerde goud bepaal vir die wierookaltaar en die goue gerubs, wie se vlerke uitstrek oor die verbondsark van die Here.

19 “Elke deel van hierdie plan,” het Dawid vir Salomo gesê, “is deur die hand van die Here op papier vir my gegee.”

20 Dawid het ook vir sy seun Salomo gesê: “Wees sterk en vol moed, en doen die werk. Moenie bang wees of moedeloos word oor die groot werk nie. Want die Here God, my God, is met jou. Hy sal jou nie in die steek laat of jou verlaat nie. Hy sal toesien dat jy al die werk aan die tempel van die Here sal voltooi.

21 Die verskillende afdelings van priesters en Leviete sal in die tempel van God dien. Daar is vakmanne met allerlei bekwaamhede tot jou beskikking. Die leiers en die hele volk is tot jou beskikking.”

Gawes vir die bou van die

tempel

1 Koning Dawid het toe na die hele vergadering gedraai en vir hulle gesê: “My seun Salomo, wat God as die volgende koning verkies het, is nog maar jonk en onervare. Die werk wat vir hom wag, is groot. Want die tempel wat hy bou, is nie maar net nog ’n gebou nie. Dit is vir die Here God self!

2 Ek het elke hulpbron tot my beskikking gebruik en soveel as wat ek kon, bymekaargemaak om die tempel van my God te bou. Daarom is daar nou genoeg goud, silwer, koper, yster en hout, sowel as groot hoeveelhede oniksstene, ander kosbare stene, duur juwele en allerhande stene en marmerstene.

3 “Omdat die tempel van my God my na aan die hart lê, gee ek al my persoonlike skatte van goud en silwer om met die konstruksie daarvan te help. Dit is buiten die boumateriaal wat ek reeds bymekaargemaak het vir sy heilige tempel.

4 Ek gee nou meer as 102 ton goud van Ofir en meer as 238 ton gesuiwerde silwer om die mure van die geboue oor te trek

5 en vir die ander werk van goud en silwer wat die ambagsmanne moet maak. Wie gaan my voorbeeld volg? Wie is gewillig om vandag geskenke vir die Here te bring?”

6 Toe het die familieleiers, die stamleiers van Israel, die generaals en kapteins van die leër en die koning se administratiewe personeel gewillig bygedra.

7 Vir die oprigting van die tempel van God het hulle gegee: byna 170 ton goud, 10 000 goue muntstukke, 340 ton silwer, 612 ton koper en 3 400 ton yster.

8 Onder toesig van Jegiël, ’n afstammeling van Gerson, het hulle ook talle edelgesteentes bygedra vir die skatkamers van die huis van die Here.

9 Die volk het gejuig oor die vrywillige gawes, want hulle het vrywillig en heelhartig bygedra vir die Here. Koning Dawid was ook vol vreugde.

Dawid se lofsang

10 Dawid het die Here geprys waar die hele vergadering teenwoordig was:

“O Here,

God van ons voorouer Israel,

mag U vir altyd geloof word!

11 Aan U, Here,

behoort die grootheid

en heerlikheid,

mag, roem en majesteit.

Alles in die hemel

en op die aarde

behoort aan U, Here.

Aan U behoort die koninkryk.

U is verhewe bo alles.

12 Rykdom en eer

kom van U alleen,

want U heers oor alles.

Krag en mag is in u hand,

om te verhoog en te versterk.

13 Ons dank U, ons God,

en prys u heerlike Naam!

14 “Maar wie is ek tog, en wie is my volk, dat ons enigiets vir U kan gee? Alles wat ons het, kom van U af, en ons gee vir U net dit wat U reeds vir ons gegee het!

15 Net soos ons voorouers is ons vreemdelinge en bywoners in die land. Ons dae op die aarde gaan soos ’n skaduwee verby, sonder enige verwagting.

16 “Here ons God, selfs hierdie boumateriaal wat ons ingesamel het om vir U ’n tempel te bou om u heilige Naam te eer, kom van U af. Dit behoort alles aan U!

17 Ek weet, my God, dat U ons harte ondersoek en opregtheid verlang. U weet dat ek dit alles met goeie motiewe geskenk het, en ek het ook gesien hoe u volk vrywillig en vreugdevol hulle geskenke gebring het.

18 “Here, God van ons voorouers Abraham, Isak en Israel, laat u volk altyd hierdie gesindheid behou. Laat hulle harte altyd getrou wees aan U.

19 Gee my seun Salomo die heelhartige begeerte om al u bevele, gebooie en beginsels te gehoorsaam, en om hierdie tempel te bou, waarvoor ek al hierdie voorbereidings getref het.”

20 Daarna het Dawid vir die hele vergadering gesê: “Prys nou die Here julle God!” Die hele vergadering het toe die Here, die God van hulle voorouers, geloof. Hulle het in eerbied voor die Here en die koning gekniel.

Salomo as koning aangewys

21 Die volgende dag het hulle 1 000 bulle, 1 000 ramme en 1 000 lammers as brandoffers aan die Here geoffer. Hulle het ook drankoffers en baie ander offers ter wille van die hele Israel gebring.

22 Hulle het in die Here se teenwoordigheid feesgevier en gedrink en was daardie dag vol vreugde.

Hulle het weer vir Dawid se seun Salomo gekroon as hulle nuwe koning. Hulle het hom voor die Here gesalf as hulle heerser, en vir Sadok as hulle priester.

23 So het Salomo die troon in die plek van sy pa, Dawid, uit die hand van die Here ontvang. Dit het goed gegaan met hom, en die hele Israel het hom gehoorsaam.

24 Al die koninklike amptenare, leërbevelvoerders en selfs al Dawid se seuns het trou aan koning Salomo gesweer.

25 En die Here het Salomo verhoog sodat die hele Israel hom bewonder het. Hy het Salomo selfs meer koninklike eer gegee as enige koning van Israel voor hom.

Opsomming van Dawid se

regering

26 So het Dawid, seun van Isai, oor die hele Israel regeer.

27 Hy het 40 jaar oor Israel regeer, sewe jaar in Hebron en 33 jaar in Jerusalem.

28 Hy is op ’n ryp ouderdom dood nadat hy ’n lang lewe, rykdom en eer geniet het. Sy seun Salomo het in sy plek regeer.

29 Alles wat in koning Dawid se regering gebeur het, van die begin tot die einde, is opgeteken inDie gedenkskrif van Samuel die siener,Die gedenkskrif van Natan die profeetenDie gedenkskrif van Gad die siener.

30 Hierdie verslae sluit al die magtige dade van sy regering in en alles wat met hom en Israel en die omliggende volke gebeur het.