’n Visioen van die toekoms
1 Hier is nog ’n visioen wat Jesaja seun van Amos gesien het oor Juda en Jerusalem:
2 In die laaste dae
sal die berg
van die tempel van die Here
die belangrikste plek
op aarde word.
Nasies sal daarheen stroom.
3 Baie volke sal kom en sê:
“Kom, laat ons
na die berg van die Here gaan,
na die tempel
van die God van Israel.
Daar sal Hy ons sy weë leer
sodat ons aan Hom
gehoorsaam kan wees.”
Want uit Sion
kom die instruksies,
en die woord van die Here
uit Jerusalem.
4 Die Here sal regspreek
tussen nasies
en dispute tussen hulle oplos.
Hulle sal ploegskare maak
van hulle swaarde
en snoeiskêre van hulle spiese.
Tussen nasies sal daar
geen oorloë meer wees nie,
en militêre opleiding
sal nie bestaan nie.
5 Kom, mense van Israel,
laat ons lewe in die lig
wat van die Here af kom!
Waarskuwing van oordeel
6 Here, U het die volk van Israel
verwerp,
want hulle is beïnvloed
deur die mense van die ooste.
Hulle het hulle fortuin laat vertel
soos die Filistyne,
en bondgenootskappe gesluit
met heidene.
7 Israel is ryk aan silwer en goud,
daar is geen einde aan hulle skatte nie,
en so ook nie
aan hulle perde
en strydwaens nie.
8 Maar die land is vol afgode.
Die mense buig neer
en aanbid hierdie dinge
wat hulle self gemaak het.
9 Daarom sal elkeen
verneder word
en laag moet buig.
Moet hulle tog nie vergewe nie!
10 Gaan skuil in grotte,
kruip weg in die grond
weens die verskrikking
van die Here
en die glans van sy majesteit!
11 Die dag kom
dat jou hoogmoedigheid en trots
jou op die grond sal laat val
en die Here alleen
verhoog sal word.
12 Op daardie dag
sal die Here, die Almagtige,
die hoogmoediges straf,
en hulle in die stof neergooi.
13 Op die Libanonberg
sal Hy elke hoë seder afkap
en elke groot boom van Basan.
14 Elke hoë berg en heuwel
sal Hy gelyk maak.
15 Elke hoë toring en versterkte muur
sal Hy afbreek.
16 Hy sal die groot handelskepe
en al die klein bote
in die hawe vernietig.
17 Die hoogmoed van alle mense
sal platgevee word.
Hulle trotsheid sal in die stof lê.
Die Here alleen
sal dan verhoog word.
18 Afgode sal heeltemal verdwyn.
19 Wanneer die Here opstaan
om die aarde te skud,
sal sy vyande wegkruip
in gate en grotte in die grond,
so bang sal hulle
vir Hom wees.
Hulle sal inkruip in grotte
in die rotse
uit vrees vir die verskrikking
van die Here
en die eer van sy grootsheid.
20 Hulle sal
hulle silwer en goue afgode
vir die molle en vlermuise los.
21 Hulle sal in gate inkruip
en tussen rotse
en teen die kranse wegkruip.
So sal hulle probeer ontsnap
aan die verskrikking
van die Here
en die eer van sy grootsheid
as Hy opstaan
om die aarde te skud.
22 Hou op om julle vertroue
op feilbare mense te stel!
Die mens het maar net
asem in sy neus!
Hoe kan hy enigiemand help?